ભારતના કટ્ટર દુશ્મન એવા પાકિસ્તાના કેટલાક ખેલાડીઓએ, પોતાના દેશના ટિકાકારો અને ટ્રોલ કરનારાઓની પરવા કર્યા વિના ટી ૨૦ વિશ્ર્વ કપમાં ભારતના ભવ્ય વિજયને સોશિયલ મીડિયા પર અભિનંદન આપીને વધાવ્યો છે. પરંતુ અભિનંદન આપનારાઓમાં, પાકિસ્તાનના કેપ્ટન સહીત મોખરાના કહેવાતા એક પણ ક્રિકેટરોનો સમાવેશ નથી. જ્યારે પાકિસ્તાન ટિમમાંથી રમતા અથવા તો રમી ચૂકેલા એવા કેટલાક ક્રિકેટરોએ ખેલદિલી દાખવીને, સોશિયલ મીડિયામાં પોસ્ટ કરીને ભારતના ભવ્ય વિજયને અભિનંદન આપીને વધાવી લીધો છે. સામાન્ય રીતે ક્રિકેટ સહીતની તમામ રમતોમાં ભારતીય ખેલાડીઓ ખેલદીલી દાખવીને જીતનારને વ્યક્તિગત અભિનંદન આપતા હોય છે. પરંતુ પાકિસ્તાનમાં તો આનાથી ઉલટો પ્રવાહ વહે છે.
પાકિસ્તાન ક્રિકેટ ટિમના કેપ્ટન બાબર આઝમ, મોહમ્મદ રિઝવાન, શાહીન આફ્રિદી, નસીમ શાહ, હારિસ રઉફ વગેરે ખેલાડીઓને ભારતે ટી ૨૦ ક્રિકેટ વિશ્ર્વ કપની ફાઈનલ મેચમાં મેળવેલી ભવ્ય જીત પચી નથી. આ તમામ ખેલાડીઓએ, તેમના ટ્વિટર પર ભારતના વિજયને વધાવતા કોઈ જ મેસેજ પોસ્ટ કર્યા નથી. આ માટે સંભવ છે કે, પાકિસ્તાનના કટ્ટરવાદી અને આકરા ટીકાકારોનો ભય સતાવી રહ્યો હોઈ શકે છે.
જ્યારે પાકિસ્તાનના કેટલાક ક્રિકેટરોએ કટ્ટરવાદી-ટિકાકારોની પરવા કર્યા વિના ખેલદીલી દાખવીને ભારતના ભવ્ય અને રોમાંચકારી વિજયને વધાવતા સંદેશ પોતાના સોશિયલ મીડિયામાં પોસ્ટ કર્યાં છે. પાકિસ્તાનના બોલર હસનઅલીએ ભારતીય ક્રિકેટ ટિમને અભિનંદન આપતા કહ્યું છે કે, શુ મેચ હતી. અદભુત ફાઈનલ, ટી ૨૦ ક્રિકેટ વિશ્ર્વ કપ જીતવા બદલે ભારતને અભિનંદન. જો કે તેણે સાઉથ આફ્રિકાની લડતને પણ વખાણી છે. તો પાકિસ્તાનના બેટ્સમેન મહમંદ હાફિઝે પોતાના ટ્વિટર એકાઉન્ટ પર ભારતની સાથે સાથે રોહીત શર્મા, જસપ્રિત બુમરાહ, હાદક પંડ્યા, બીસીસીઆઈને ટેગ કરીને અભિનંદન આપવાની સાથે સાથે રમતને વખાણી છે.
ઉમરાન અકમલે પણ ટ્વિટર પર ઉપરા ઉપરી બે પોસ્ટ કરીને ભારતને ભવ્ય વિજય બદલ અભિનંદન પાઠવ્યા હતા. કામરાન અકમલે કહ્યું છે કે, ભારતે દરેક ક્ષેત્રે ઉમદા રમત દાખવી, ટિમ વર્કનું ઉમદા ઉદાહરણ સાબિત કર્યું છે. તેણે સૂર્યાકુમારના કેચના પણ મ્હોફાંટ વખાણ કર્યાં છે. એક સમયે હાથમાંથી સરકી રહેલ મેચમાં ભારત જે રીતે ૧૬મી ઓવરમાં પરત ફર્યું તેના પણ કામરાન અકમલે વખાણ કર્યાં છે.
પાકિસ્તાન મહિલા ક્રિકેટ ટિમની ખેલાડી ફાતિમા સનાએ પણ ટિમ ઈન્ડિયાના વખાણ કરવાની સાથે જીત બદલ શુભેચ્છાઓ પાઠવી છે. ફાતિમાએ વિરાટ કોહલીની ટી ૨૦ ક્રિકેટમાંથી નિવૃતિને પણ બખુબી વધાવી લીધી છે. પાકિસ્તાનના ફાસ્ટ બોલર, શોએબ અખ્તર પોતાની તીખી પ્રતિક્રિયા આપવા માટે જાણીતો છે. શોએબ અખ્તરે પોતાના ટ્વિટર પર એક વીડિયો પોસ્ટ કરીને ભારતને અભિનંદન આપ્યાં છે.
પાકિસ્તાનના કેટલાક ક્રિકેટરોએ, પાકિસ્તાન ક્રિક્રેટ બોર્ડ, કટ્ટરવાદી ટીકાકારોની કોઈ પણ જાતની ચિંતા કે પરવા કર્યા વિના ખેલદીલી દાખવીને, ટી૨૦ વિશ્ર્વ કપમાં ભારતની ભવ્ય જીતને અનેરા શબ્દોમાં સોશિયલ મીડિયામાં વધાવી લીધી છે.