લોક્સભા ચૂંટણીમાં ખરાબ પ્રદર્શન બાદ મહારાષ્ટ્રના ભાજપ-શિવસેના અને એનસીપીના મહાગઠબંધનમાં તિરાડ વધી રહી છે. બીજેપીના સહયોગી શિવસેના પ્રમુખ અને રાજ્યના મુખ્યમંત્રી એકનાથ શિંદે હવે તેમને ટોણા મારવા લાગ્યા છે. તેમણે રાજ્યમાં શાસક ગઠબંધનના નબળા પ્રદર્શન માટે ભાજપના ૪૦૦થી વધુના નારાને જવાબદાર ઠેરવવાનું શરૂ કર્યું છે.
એકનાથ શિંદેએ બીજેપીના ‘૪૦૦ પાર’ના નારા પર કટાક્ષ કરતા કહ્યું કે, ‘ભાજપે ‘૪૦૦ પાર’નો નારો આપ્યો હતો અને લોક્સભા ચૂંટણીમાં ૪૦૦થી વધુ સીટો જીતવાનો લક્ષ્યાંક રાખ્યો હતો, પરંતુ કેટલાક વિસ્તારોમાં નકારાત્મક વલણ રાખવામાં આવ્યું હતું. તેના સંબંધમાં બંધારણમાં ફેરફાર કરવામાં આવશે અને તેની સાથે ‘૪૦૦ પાર’ કરવાનો લક્ષ્યાંક રાખવામાં આવ્યો હતો. આ સૂત્રની આડઅસર વર્ણવતા શિંદેએ કહ્યું કે, ‘લોકોએ વિરોધની આ વાતને ધ્યાનમાં લીધી અને તેની વિપરીત અસર થઈ છે. તેમની ગાડી ૩૦૦નો આંકડો પણ પાર કરી શકી નથી. ઘણા રાજ્યોમાં તેને મોટો આંચકો લાગ્યો છે. આ કારણે મહારાષ્ટ્રમાં પણ મહાયુતિને અપેક્ષા મુજબની સફળતા મળી નથી.
શિવસેના પ્રમુખે કહ્યું કે, ‘લોકોમાં ખોટા નિવેદનો અને અફવાઓ મોટા પાયે ફેલાવવામાં આવી હતી કે બંધારણ બદલાશે અને અનામતમાં ઘટાડો થશે. તેમાં મુસ્લિમ, દલિત અને બીજા ઘણા લોકો હશે. આજે સર્જાયેલી મૂંઝવણ ચોક્કસપણે લોકો સમક્ષ આવશે. જે વોટબેંકની રાજનીતિ થઈ છે તેની લોકોને ખબર પડશે. વોટબેંકની રાજનીતિ કરનારાઓના અસલી ચહેરા પણ ચોક્કસપણે સામે આવશે.
આ સાથે મહારાષ્ટ્રના પરિણામો પર એકનાથ શિંદેએ કહ્યું કે, ‘હું કહીશ કે અમારી શિવસેનાનું પ્રદર્શન, અમારી સ્ટ્રાઈક રેટ પહેલા કરતા વધુ સારી થઈ ગઈ છે. અમે ૧૩ બેઠકો પર ચૂંટણી લડી અને તેમાંથી ૭ જીતી છે. અમને મુંબઈમાં તેમના કરતા ૨ લાખથી વધુ મત મળ્યા છે. શિવસેનાના ૯૦ ટકા વોટમાંથી અમારી પાસે ૪૦ ટકા વોટ છે. અમને શિવસેનાના આધારે મત મળ્યા છે. આ સ્પષ્ટપણે દર્શાવે છે કે, અમે સ્ટ્રાઈક રેટ, વોટ શેરમાં આગળ છીએ અને લોકો અમારી સાથે છે.
શિંદેના આ નિવેદનોને દબાણની રાજનીતિ તરીકે જોવામાં આવી રહ્યા છે. મહારાષ્ટ્રમાં શિંદેની આગેવાની હેઠળની શિવસેનાના લોક્સભામાં ૭ અને રાજ્યસભામાં એક સાંસદ છે. વડા પ્રધાન નરેન્દ્ર મોદીના નેતૃત્વમાં નવી રચાયેલી સરકારમાં પાર્ટીને આયુષ મંત્રાલયમાં કેન્દ્રીય રાજ્ય પ્રધાન (સ્વતંત્ર હવાલો) અને આરોગ્ય અને પરિવાર કલ્યાણ મંત્રાલયમાં રાજ્ય પ્રધાનનું પદ મળ્યું છે.