ઉત્તર ભારતના મોટાભાગના રાજ્યો આકરી ગરમીની લપેટમાં છે. દિલ્હી, હરિયાણા, પંજાબ, મયપ્રદેશ, છત્તીસગઢ અને બિહારમાં તાપમાન ૪૪ ડિગ્રી સેલ્સિયસ પર પહોંચી રહ્યું છે. તાપમાનમાં વધારો થવાની સાથે સાથે દિવસ દરમિયાન પણ ગરમીનું મોજું ચાલી રહ્યું છે. ભારતીય હવામાન વિભાગે ગુરુવાર સુધી રાજધાની દિલ્હી અને એનસીઆરમાં હીટ વેવનું એલર્ટ જાહેર કર્યું છે. હવામાન વિભાગે કહ્યું કે મંગળવારે દિલ્હી અને એનસીઆરના જુદા જુદા ભાગોમાં ફરી ગરમીની સ્થિતિ પાછી આવી છે. આગામી દિવસોમાં દિલ્હી-એનસીઆરમાં ફરી એકવાર તાપમાન વધશે અને આકરી ગરમી પડશે.
હવામાન વિભાગના જણાવ્યા અનુસાર દિલ્હીમાં મહત્તમ તાપમાન ૪૩.૨૧ ડિગ્રી સેલ્સિયસ રહેવાની સંભાવના છે. આગામી દિવસોમાં મહત્તમ તાપમાન ૪૬ ડિગ્રીને પાર કરી જશે.દિલ્હી-એનસીઆરમાં વધતી જતી ગરમીની સાથે સાથે દિવસ દરમિયાન ગરમીના મોજા પણ આવવાની આગાહી કરવામાં આવી છે.
ઉત્તર પ્રદેશ અને બિહારના અનેક જિલ્લાઓ ભારે ગરમીની ઝપેટમાં છે. બિહારની રાજધાની પટનામાં દિવસ દરમિયાન ગરમીનો અનુભવ થઈ રહ્યો છે અને તાપમાન ૪૩ ડિગ્રીને પાર કરી રહ્યું છે. સ્થાનિક હવામાન વિભાગે વૈશાલી, સાસારામ, સિવાન, ગોપાલગંજ અને સહરસા જિલ્લાઓ માટે હીટ વેવ એલર્ટ જાહેર કર્યું છે. હવામાન વિભાગે જણાવ્યું કે, રાજધાની પટના સહિત આ તમામ જિલ્લાઓમાં આગામી ત્રણ દિવસ સુધી ગરમીનો પ્રકોપ રહેશે.
ઘણા રાજ્યોમાં આકરી ગરમી વચ્ચે ભારતીય હવામાન વિભાગે દેશના અન્ય ભાગોમાં પણ વરસાદનું એલર્ટ જાહેર કર્યું છે. હવામાન વિભાગે કહ્યું કે અરુણાચલ પ્રદેશ, આસામ, મેઘાલય, મિઝોરમ, ત્રિપુરા અને પશ્ર્ચિમ બંગાળના ઘણા જિલ્લાઓમાં ભારે વરસાદ પડશે. આ તમામ રાજ્યોના જિલ્લાઓમાં ૧૫ જૂન સુધી ગાજવીજ અને વીજળીના ચમકારા સાથે વરસાદની આગાહી કરવામાં આવી છે.
દક્ષિણના ઘણા રાજ્યોમાં ચોમાસાનું આગમન થઈ ગયું છે. જેના કારણે કેરળ, તમિલનાડુ, કર્ણાટક અને આંધ્રપ્રદેશના ઘણા ભાગોમાં ભારે વરસાદ થઈ રહ્યો છે. જૂનના અંતિમ દિવસોમાં રાજધાની દિલ્હી સહિત ઉત્તર ભારતના ઘણા રાજ્યોમાં ચોમાસાનું આગમન થવાની સંભાવના છે. હવામાન વિભાગે કહ્યું કે ચોમાસું ૨૭ જૂન સુધીમાં દિલ્હીમાં આવી શકે છે. ઉત્તર પ્રદેશમાં ચોમાસાનો પહેલો વરસાદ ૨૪ થી ૨૫ની વચ્ચે થઈ શકે છે.