ગોધરા તાલુકાના કેવડીયા ગામે ખેતરમાં પતરાના શેડમાંથી અજાણ્યા બાળકનો સુકાઈ ગયેલી હાલતમાં મૃતદેહ મળી આવ્યો હતો. પોલીસ દ્વારા મૃતદેહનો કબ્જો મેળવીને બાળકની ઓળખ છતી કરવા પ્રયત્નો હાથ ધર્યા હતા.
પ્રાપ્ત માહિતી અનુસાર ગોધરા તાલુકાના કેવડીયા ગામે આવેલા શિકારી ફળિયામાં રહેતા ધર્મેન્દ્ર ભારતભાઈ શિકારીએ ગોધરા તાલુકા પોલીસ મથકે અકસ્માત મોત અન્વયે ફરિયાદ આપી હતી અને જણાવ્યુ હતુ કે,ગોધરા તાલુકાના કેવડીયા ગામ નજીક ફાટક પાસે તેઓનુ ખેતર આવેલુ છે. જે ખેતર તેઓએ પતરાના શેડ ઉભા કરીને ચોમાસામા ગાડી મુકવાનુ બનાવ્યુ છે. જે શેડમાં તેઓ ગયા હતા તે વેળાએ તેઓની નજર છાપરામાં એક શંકાસ્પદ પદાર્થ પર પડી હતી. જે જોતા અંદાજે 3 થી 4 વર્ષની વયના બાળકનો સુકાઈ ગયેલ હાલતમાં સડી ગયેલો મૃતદેહ મળી આવ્યો હતો. જેને પગલે ધર્મેન્દ્ર શિકારી ડરી ગયા હતા. જે બાદ તેઓએ ગામના અન્ય વ્યકિતઓને જાણ કરતા પોલીસને જાણ કરવામાં આવી હતી.