જયપુર, રાજસ્થાનમાં ઉનાળાની સ્થિતિ એવી છે કે ન તો દિવસે શાંતિ મળે છે અને ન તો રાત્રે આરામ મળે છે. ફલોદીમાં છેલ્લા ૨૪ કલાકમાં સૌથી ગરમ દિવસ રહ્યો હતો. અહીં મહત્તમ તાપમાન ૫૦ ડિગ્રીએ પહોંચી ગયું હતું. તે જ સમયે, બાડમેરમાં રાત્રિનું તાપમાન સૌથી વધુ હતું. બાડમેરમાં લઘુત્તમ તાપમાન ૩૩.૬ ડિગ્રી સેલ્સિયસ નોંધાયું હતું.
હવામાન વિભાગે ચેતવણી આપી છે કે આગામી ત્રણ દિવસ ગરમીનો ત્રાસ યથાવત રહેશે. રાજસ્થાનના તમામ પંથકોમાં દિવસ દરમિયાન ગરમીનો પ્રકોપ જારી રહ્યો છે. જ્યારે જોધપુર, અજમેર, ઉદયપુર અને બિકાનેર ડિવિઝનમાં હોટ નાઈટ નોંધાઈ છે. આજે રવિવારે રાજસ્થાનના મોટાભાગના જિલ્લાઓમાં રેડ એલર્ટ જારી કરવામાં આવ્યું છે.
રાજધાની જયપુરમાં આગામી બે દિવસમાં મહત્તમ તાપમાન ૪૭ ડિગ્રી સુધી પહોંચી શકે છે. હવામાન વિભાગના જણાવ્યા અનુસાર, દક્ષિણ પૂર્વ રાજસ્થાન, મધ્યપ્રદેશ અને તેલંગાણામાં સમુદ્ર સપાટીથી ૦.૯ કિમી ઉપર સાયક્લોનિક સર્ક્યુલેશન છે, જેના કારણે હવામાનમાં આ અસર જોવા મળી રહી છે. અત્યાર સુધીમાં રાજસ્થાનમાં હીટ સ્ટ્રોકના કારણે કુલ ૧૮ લોકોના મોત થયા છે.જાલોર, ભીલવાડા અને અજમેરમાં ગરમીના મોજાને કારણે મૃત્યુ નોંધાયા હતા. જો કે તેમનો પોસ્ટમોર્ટમ રિપોર્ટ હજુ આવ્યો નથી.
પૂર્વ રાજસ્થાનના કેટલાક ભાગોમાં ૨૯ મેથી અને પશ્ર્ચિમ રાજસ્થાનના કેટલાક ભાગોમાં ૩૦ મેથી મહત્તમ તાપમાનમાં ૨ થી ૩ ડિગ્રી સેલ્સિયસનો ઘટાડો થવાની સંભાવના છે. જૂનના પ્રથમ સપ્તાહમાં રાજ્યના મોટાભાગના વિસ્તારોમાં મહત્તમ તાપમાન સામાન્યની નજીક નોંધાય તેવી શક્યતા છે.