નવીદિલ્હી, આપ સાંસદ સ્વાતિ માલીવાલના ગેરવર્તન કેસ બાદ દિલ્હીમાં રાજકીય યુદ્ધ ફાટી નીકળ્યું છે. આ દરમિયાન એક નવો કિસ્સો પ્રકાશમાં આવ્યો છે. દિલ્હી મેટ્રોમાં અરવિંદ કેજરીવાલ સામે જાનથી મારી નાખવાની ધમકી લખવામાં આવી છે. મેટ્રો સ્ટેશન સહિત મેટ્રોની અંદર ઘણી જગ્યાએ કેજરીવાલને મારી નાખવાની ધમકીઓ લખવામાં આવી છે. આમ આદમી પાર્ટીએ સોશિયલ મીડિયા પર પોસ્ટ કરીને ગંભીર આરોપ લગાવ્યા છે.
આમ આદમી પાર્ટી એક્સ હેન્ડલ પરથી પોસ્ટમાં લખવામાં આવ્યું છે કે દિલ્હીના મુખ્યમંત્રી અરવિંદ કેજરીવાલને જાહેરમાં જાનથી મારી નાખવાની ધમકી આપવામાં આવી રહી છે. પીએમઓ, ભાજપ અને નરેન્દ્ર મોદીના કહેવા પર રાજીવ ચોક, પટેલ નગર મેટ્રો સ્ટેશન પર ધમકી લખવામાં આવી છે.જો અરવિંદ કેજરીવાલને કંઈ થશે તો તેના માટે ભાજપ અને નરેન્દ્ર મોદી સીધા જ જવાબદાર હશે. આ અંગે આમ આદમી પાર્ટીના મંત્રી આતિશી અને સાંસદ સંજય સિંહે પ્રેસ કોન્ફરન્સ કરી હતી. બંને નેતાઓએ ભાજપ પર પ્રહારો કર્યા છે.આતિશીનું કહેવું છે કે કેજરીવાલ પર હુમલો કરવાનું ષડયંત્ર રચવામાં આવી રહ્યું છે. દિલ્હીના મુખ્યમંત્રી કેજરીવાલને ખુલ્લેઆમ જાનથી મારી નાખવાની ધમકી આપવામાં આવી છે. આતિશીએ મીડિયાને કેટલીક ફોટોકોપી પણ બતાવી.
દિલ્હીના મંત્રી આતિશીએ પ્રેસ કોન્ફરન્સમાં જણાવ્યું કે દિલ્હીના મુખ્યમંત્રી અરવિંદ કેજરીવાલને જાહેરમાં જાનથી મારી નાખવાની ધમકી આપવામાં આવી રહી છે. પીએમઓ, ભાજપ અને નરેન્દ્ર મોદીના કહેવા પર રાજીવ ચોક, પટેલ નગર મેટ્રો સ્ટેશન પર ધમકી લખવામાં આવી છે. જો અરવિંદ કેજરીવાલને કંઈ થશે તો તેના માટે ભાજપ અને નરેન્દ્ર મોદી સીધા જ જવાબદાર હશે.
આતિશીએ કહ્યું કે ભાજપ અને નરેન્દ્ર મોદી અરવિંદ કેજરીવાલથી ડરે છે. આ લોકો જાણે છે કે તેઓ ચૂંટણી મેદાનમાં કેજરીવાલ અને આમ આદમી પાર્ટીનો સામનો કરી શક્તા નથી. જ્યારથી અરવિંદ કેજરીવાલ જેલમાંથી બહાર આવ્યા છે. ત્યારપછી ભાજપ અને નરેન્દ્ર મોદીએ કેજરીવાલ પર એક પછી એક હુમલાનું ષડયંત્ર રચ્યું છે. લોક્સભા ચૂંટણીની જાહેરાત થતાની સાથે જ ૨૧ માર્ચે કેજરીવાલને નકલી કેસમાં જેલમાં મોકલી દેવામાં આવ્યા હતા. તેની દવા અને ઇન્સ્યુલિન જેલમાં બંધ કરી દેવામાં આવ્યું હતું. અમે દવાઓ અને ઇન્સ્યુલિન માટે કોર્ટમાં જઈએ છીએ. ત્યારે જ તેમને દવા મળે છે.
તેમણે વધુમાં કહ્યું કે, દિલ્હીના લોકોના પ્રેમ અને સુપ્રીમ કોર્ટના આદેશના કારણે અરવિંદ કેજરીવાલને જામીન મળ્યા છે. હવે જેલમાંથી બહાર આવ્યા બાદ ભાજપ ડરી ગયો છે અને તેમની સામે ષડયંત્ર રચવામાં આવી રહ્યું છે. સ્વાતિ માલીવાલ જીને પ્યાદા બનાવીને કેજરીવાલ વિરુદ્ધ ષડયંત્ર રચવામાં આવ્યું છે. મુખ્યમંત્રીના આવાસ પરથી સામે આવેલા વીડિયોમાં સ્વાતિના આરોપોનું સત્ય સમગ્ર દેશે જોઈ લીધું છે.
વધુમાં કહ્યું કે અમે માનીએ છીએ કે સ્વાતિને તેની સામેના એસીબી કેસને લઈને ધમકી આપવામાં આવી હતી. તેને આ ષડયંત્રનો ચહેરો બનાવવામાં આવ્યો છે. આ અંતર્ગત અરવિંદ કેજરીવાલ પર આરોપ લગાવવાના હતા. પરંતુ આ કાવતરું પણ નિષ્ફળ ગયું. હવે ભાજપ તેના છેલ્લા ઉપાય પર આવી ગયું છે. હવે તેઓ કેજરીવાલને મારવાનું કાવતરું ઘડી રહ્યા છે. રાજીવ ચોક, પટેલ નગર મેટ્રો સ્ટેશન અને ઘણી મેટ્રો ટ્રેનની અંદર કેજરીવાલને મારી નાખવાની ધમકીઓ લખવામાં આવી છે.
દિલ્હી મંત્રીએ કહ્યું કે આ તમામ મેટ્રો સ્ટેશન સંપૂર્ણપણે સીસીટીવી કેમેરાની દેખરેખ હેઠળ છે. પોલીસ અને સીઆઇએસએફ સુરક્ષાકર્મીઓ અહીં ૨૪ કલાક હાજર રહે છે. આમ છતાં એક વ્યક્તિ ધમકી લખીને અહીંથી ચાલ્યો જાય છે અને હવે તેને કોઈ શોધતું પણ નથી. આ વ્યક્તિએ તેના સોશિયલ મીડિયા એકાઉન્ટ પર તમામ ધમકીઓ પણ પોસ્ટ કરી છે. દિલ્હી પોલીસ અને તેમના સાયબર સેલ હવે ક્યાં ગયા? હજુ સુધી આ વ્યક્તિ સામે કોઈ કાર્યવાહી કરવામાં આવી નથી. એ જ દિલ્હી પોલીસ સ્વાતિ માલીવાલના ખોટા આરોપો પર સુપર એક્ટિવ થઈ ગઈ છે અને હવે કંઈ કરી રહી નથી.
આપના રાજ્યસભા સાંસદ સંજય સિંહે મુખ્યમંત્રી અરવિંદ કેજરીવાલને જાનથી મારી નાખવાની ધમકીના મુદ્દે પ્રેસ કોન્ફરન્સ કરી હતી. સંજય સિંહે કહ્યું કે જ્યારથી અરવિંદ કેજરીવાલ જેલમાંથી બહાર આવ્યા છે ત્યારથી ભાજપ ગભરાટમાં છે. ભાજપ હવે અરવિંદ કેજરીવાલ પર ઘાતક હુમલો કરવાની યોજના બનાવી રહ્યું છે. આ ષડયંત્ર સીધુ પીએમઓથી ચલાવવામાં આવી રહ્યું છે. રાજીવ ચોક અને પટેલ નગર મેટ્રો સ્ટેશન પર કેજરીવાલ પર હુમલો કરવાની ધમકીઓ લખવામાં આવી હતી. તેમણે વધુમાં જણાવ્યું હતું કે વડાપ્રધાન નરેન્દ્ર મોદી અને ભાજપ નફરત અને બદલાની ભાવનામાં એટલા ડૂબી ગયા છે કે તેઓ મુખ્યમંત્રીનો જીવ લેવાનું કાવતરું કરી રહ્યા છે. હું ગવર્નન્સ, એડમિનિસ્ટ્રેશન અને ચૂંટણી પંચને કહેવા માંગુ છું કે જો અરવિંદ કેજરીવાલને કંઈ થશે તો તેના માટે પીએમઓ, ભાજપ અને નરેન્દ્ર મોદી જવાબદાર હશે. પહેલા આ લોકોને ૨૩ દિવસ સુધી જેલમાં ઇન્સ્યુલિન આપવામાં આવતું ન હતું અને હવે આ બધું કરવામાં આવી રહ્યું છે.