એટા, લોક્સભા ચૂંટણીની નિષ્પક્ષતા અને પારદર્શિતા પર સવાલ ઉઠાવતો એક વીડિયો આ દિવસોમાં વાઈરલ થઈ રહ્યો છે, જેમાં એક યુવક ઘણી વખત બીજેપીને વોટ આપતો જોવા મળે છે. આ વીડિયોને લઈને વિવાદ ઊભો થયા બાદ મુખ્ય ચૂંટણી અધિકારી નવદીપે યુવક વિરુદ્ધ એટામાં કેસ દાખલ કર્યો છે. તેમજ પોલિંગ ટીમને સસ્પેન્ડ કરવા અને શિસ્તભંગની કાર્યવાહી શરૂ કરવા સૂચના આપવામાં આવી છે. આ સિવાય સંબંધિત મતદાન મથકમાં ફરીથી મતદાન કરાવવાની ભલામણ ઈઝ્રૈંને કરવામાં આવી છે.
તમને જણાવી દઈએ કે આ વીડિયો સામે આવ્યા બાદ સમાજવાદી પાર્ટીના અધ્યક્ષ અખિલેશ યાદવ અને કોંગ્રેસ નેતા રાહુલ ગાંધીએ ફેસબુક પર પોસ્ટ કરીને ચૂંટણી પંચ અને ભાજપ પર આકરા પ્રહારો કર્યા હતા. વાયરલ વીડિયોમાં એક યુવક ૮ વખત વોટિંગ કરતો જોવા મળી રહ્યો છે. આરોપ છે કે તેઓ વારંવાર પોલિંગ બૂથ પર આવ્યા અને દરેક વખતે ભાજપને વોટ આપ્યો.
આ મામલે કાર્યવાહી કરતા મુખ્ય ચૂંટણી અધિકારી નવદીપે કહ્યું કે, એક વ્યક્તિએ ઘણી વખત વોટિંગ કર્યાનો વીડિયો સોશિયલ મીડિયા પર વાયરલ થયો છે. તેમણે કહ્યું કે આ ઘટના પર એટા જિલ્લાના નયાગાંવ પોલીસ સ્ટેશનમાં આઈપીસીની કલમ ૧૭૧-એફ અને ૪૧૯ અને આરપી એક્ટ ૯૫૧ની કલમ ૧૨૮, ૧૩૨ અને ૧૩૬ હેઠળ કેસ નોંધવામાં આવ્યો છે.
તેમણે કહ્યું કે વીડિયોમાં જે વ્યક્તિ ઘણી વખત વોટિંગ કરતો જોવા મળે છે તેની ઓળખ ખીરિયા પમરાન ગામ નિવાસી અનિલ સિંહના પુત્ર રાજન સિંહ તરીકે થઈ છે. પોલીસે રાજનની ધરપકડ કરી છે. આ સિવાય પોલિંગ પાર્ટીના તમામ સભ્યોને સસ્પેન્ડ કરવા અને શિસ્તભંગની કાર્યવાહી શરૂ કરવા સૂચના આપવામાં આવી છે. તેમજ સંબંધિત મતદાન મથકમાં પુન: મતદાન કરાવવાની ભલામણ ઇસીઆઇને કરવામાં આવી છે.
અધિકારીએ જણાવ્યું હતું કે યુપીના અન્ય તબક્કામાં તમામ જિલ્લા ચૂંટણી અધિકારીઓને મતદાર ઓળખની પ્રક્રિયાને કડક રીતે અનુસરવા માટે કડક સૂચનાઓ આપવામાં આવી છે. તેમણે કહ્યું કે ચૂંટણીમાં ધાંધલધમાલ કરનારાઓને બક્ષવામાં આવશે નહીં.