કેન્યા, કેન્યામાં પૂરના કારણે ચારે બાજુ તબાહી સર્જાઈ છે. આફ્રિકન દેશના ૪૭ કાઉન્ટીઓમાંથી ૩૮ પ્રભાવિત થયા છે. કેન્યા સરકારના આંકડાઓ અનુસાર, વિનાશક પૂરના કારણે ૨૬૭ લોકોના મોત થયા છે અને ૨,૮૦,૦૦૦ લોકો વિસ્થાપિત થયા છે. દરમિયાન, ભારતે કેન્યાના પૂર પ્રભાવિત વિસ્તારોમાં રાહત અને પુનર્વસન માટે ૪૦ ટન રાહત સામગ્રી મોકલી છે.
માલસામાનમાં ૨૨ ટન રાહત સામગ્રી જેવી કે તંબુ, સ્લીપિંગ બેગ અને સાદડીઓ, ધાબળા, પાવર જનરેશન સેટ, ખાવા માટે તૈયાર ખોરાક, મૂળભૂત સ્વચ્છતા સુવિધાઓ અને સ્વચ્છતા કીટનો સમાવેશ થાય છે. આ ઉપરાંત ૧૮ ટન મેડિકલ સહાય પણ કન્સાઈનમેન્ટમાં સામેલ છે. આમાં ગંભીર સંભાળ અને ઘા વાગવાના સંબંધમાં જરૂરી જીવનરક્ષક દવાઓ અને સર્જીકલ સાધનોનો સમાવેશ થાય છે. તેમાં બેબી ફૂડ, પાણી શુદ્ધિકરણ, માસિક સ્ત્રાવની સ્વચ્છતા અને મચ્છર નિવારક દવાઓ, મેલેરિયા અને ડેન્ગ્યુ નિદાન કીટ, ઝેર વિરોધી સારવાર અને વિવિધ પરીક્ષણ કીટ જેવી આવશ્યક વસ્તુઓનો પણ સમાવેશ થાય છે. ટ્વિટર પર પોસ્ટ શેર કરતી વખતે, વિદેશ પ્રધાન એસ જયશંકરે લખ્યું, ‘કેન્યામાં પૂરથી પ્રભાવિત લોકોને મોકલવામાં આવેલા એચએડીઆરના બીજા કન્સાઇનમેન્ટમાં ૪૦ ટન દવાઓ, તબીબી પુરવઠો અને અન્ય સાધનોનો સમાવેશ થાય છે. અમે ઐતિહાસિક ભાગીદારી અને વિશ્ર્વ ભાઈચારા માટે ઊભા છીએ.
કેન્યામાં ભારતના હાઈ કમિશનર નમગ્યા ખામ્પાએ કેબિનેટ સચિવ મર્સી વેન્ઝોઉને રાહત સામગ્રી સોંપી. આ પહેલા પણ ૧૦ મેના રોજ ભારતીય નૌકાદળના જહાજ સુમેધા દ્વારા રાહત સામગ્રીનો એક માલ કેન્યા પહોંચાડવામાં આવ્યો હતો. ભારત દ્વારા જારી કરાયેલા નિવેદનમાં કહેવામાં આવ્યું છે કે કેન્યાને મદદ એ દક્ષિણ સહયોગની ભાવના અને આફ્રિકાને અમારી પ્રાથમિક્તાઓમાં ટોચ પર રાખવાની અમારી પ્રતિબદ્ધતા સાથે દેશ સાથેના મજબૂત અને મૈત્રીપૂર્ણ સંબંધોનું પુનરાવર્તન છે. ભારતે પૂરને કારણે થયેલા નુક્સાન અને વિનાશ માટે કેન્યાની સરકાર અને લોકો પ્રત્યે ઊંડી સંવેદના વ્યક્ત કરી છે.