મલેકપુર, મહિસાગર જિલ્લાના લુણાવાડા તાલુકાના હાડોડ ગામ પાસેથી પસાર થતી મહિસાગર નદીમાં જુના પુલ પરથી કાર ખાબકી હતી. કારમાંથી હાલ એક વ્યકિતનો મૃતદેહ નદીમાં જોવા મળ્યો હતો. જોકે કારમાં અન્ય કેટલી વ્યકિત સવાર હતી તે હાલ સુધી જાણી શકાયુ નથી. હાલ મહિસાગર જિલ્લાની પોલીસ ધટના સ્થળે જઈ તપાસ હાથ ધરી હતી. નદીમાં ખાબકેલ કાર પાણીમાં ગરકાવ થઈ ગઈ છે. જેને બહાર કાઢવાની તજવીજ હાથ ધરવામાં આવી છે. આ બનાવની જાણ લુણાવાડા ફાયર વિભાગની ટીમને થતાં બોટ સાથે મહિસાગર નદી પાસે પહોંચી તપાસ હાથ ધરી હતી. હાલ નદીમાં ખાબકેલી કારમાંથી લુણાવાડાના કાકચીયા ગામના વતની મયુર પટેલ નામના યુવકની લાશ બહાર કાઢી પી.એમ.અર્થે લુણાવાડાની સિવિલ હોસ્પિટલમાં ખસેડાઈ છે. કાર લઈ આવતા ચાલકે સ્ટિયરીંગ પરથી કાબુ ગુમાવતા અકસ્માત સર્જાયો હતો. બ્રિજ ખખડધજ અને તુટેલી હાલતમાં હોવાથી ત્યાંથી પસાર થતાં ચાલકે કાબુ ગુમાવતા બ્રિજના તુટેલા સ્લેબ પર કારનુ ટાયર જતાં કાર બેકાબુ થઈ હતી.