નવસારી, ભાજપના પ્રદેશ પ્રમુખ સીઆર પાટીલ પણ આજે નવસારી લોક્સભા બેઠક માટે વિજય મુહૂર્તમાં ઉમેદવારી ફોર્મ ભર્યું છે. ગત લોક્સભા ચૂંટણીમાં આખા દેશમાં સૌથી વધુ લીડ સાથે જો કોઈ બેઠક કોઈ ઉમેદવારે જીતી હોય તો તે નવસારી સીટ છે. અહીંથી પાટીલની લીડ ૭ લાખથી પણ વધુની હતી અને એટલે આ વખતે પણ પાટીલની જીત આસાન હશે તેવું અનેક વિશ્લેષકોનું માનવું છે. ત્યારે આ વખતે કોંગ્રેસ પણ પ્રચાર પ્રસારમાં લાગી છે. નવસારી બેઠક પર ભાજપ દ્વારા અલગ અલગ કાર્યક્રમો કરવામાં આવી રહયા છે. મોદીનું પરિવાર અને જનસંપર્ક કાર્યક્રમો થકી લોકો સુધી ભાજપ પહોંચવાની રણનીતિ પર કામ કરી રહ્યું છે. ભાજપને આ સીટ ફરી એકવાર જીતવાની આશા છે.
આ બેઠકની આંકડાકીય માહિતી પર નજર કરીએ તો ૨૦૧૯ની ભાજપના ઉમેદવાર સી. આર.પાટીલે કોંગ્રેસના ઉમેદવાર ધર્મેશ પટેલને ૬,૮૯,૬૬૮ના મતોથી હરાવ્યા હતા. નવસારી અગાઉ વલસાડ લોક્સભા બેઠકમાં આવતી હતી. નવસારી લોક્સભામાં કુલ ૭ વિધાનસભાનો સમાવેશ થાય છે.
આ બેઠક પર સુરત જિલ્લાની લિંબાયત, ઉધના, મજુરા અને ચોર્યાસી વિધાનસભા વિસ્તાર અને જલાલપોર, નવસારી તથા ગણદેવી મળીને કુલ ૭ વિધાનસભા વિસ્તાર સાથે નવસારી લોક્સભા બેઠકનું નિર્માણ કરાયું હતું. આ વિસ્તારમાં ૨૨ રાજ્યના લોકો મતદાર હોવાથી નવસારી બેઠકને મિનિ ભારત કહેવામાં આવે છે.
અહીં સુરતના ૬૦ અને નવસારીના ૪૦ ટકા મતદારોનો સમાવેશ થાય છે. કોળી મતદારોની સંખ્યા અહીં વધુ છે. જે બાદ મહારાષ્ટ્રીયન મતદારો છે. આ બેઠક જ્યારથી અસ્તિત્વમાં આવી ત્યારથી જ ભાજપનો દબદબો રહ્યો છે. નવસારી લોક્સભા મતવિસ્તારમાં ૧૭ લાખ ૬૪ હજાર ૬૨૨ મતદાતાઓ છે. જેમાં ૭ લાખ ૯૨ હજાર ૪૮૦ મહિલા અને ૯ લાખ ૭૨ હજાર ૯૦ પુરૂષ મતદાતાઓ છે.