ગાઝા, રશિયા અને યુક્રેન બાદ હવે બીજા બે દેશો વચ્ચે છેડાયું છે યુદ્ધ. આ દેશો છે ઈરાન અને ઈઝરાયેલ. ભારત સહિત હાલ દુનિયાભરની નજર આ બન્ને દેશોની ગતિવિધીઓ પર છે. કારણકે, ક્યારેય પણ કોઈ બે દેશો વચ્ચે યુદ્ધ થાય તો એ માત્ર બે દેશો પુરતું સીમિત નથી રહેતું પણ સમગ્ર દુનિયા પર તેનો પ્રભાવ પડે છે. ઈરાને ઈઝરાયલ પર હવાઈ હુમલો શરૂ કર્યો છે. ૨૦૦ ડ્રોન અને મિસાઈલ છોડી ઈરાને ઈઝરાયલમાં રીસતરનો હાહાકાર મચાવ્યો છે. વળતો જવાબ આપવા નેતન્યાહૂએ વોર કેબિનેટની મીટિંગ કરી છે. સાથે આ મામલે ઈઝરાયેલે અમેરિકી રાષ્ટ્રપતિ જો બાઇડનને ફોન કર્યો અને સમગ્ર મામલે વિગતવાર વાતચીત કરી છે. આ મામાલે હવે ઈઝરાયેલ પણ જવાબી કાર્યવાહી કરશે તે અંગે પણ અમેરિકાને જાણકારી આપવામાં આવી છે.
ઈઝરાયેલ અને ઈરાન વચ્ચે યુદ્ધ જેવી સ્થિતિ છે. ઈરાને ઈઝરાયેલ તરફ સેંકડો ડ્રોન છોડ્યા છે. બીજી તરફ ઈઝરાયેલની એર ડિફેન્સ સિસ્ટમ તૈયાર છે. ઈરાની ડ્રોન લોન્ચ થયા બાદ ઈઝરાયેલ ડિફેન્સ ફોર્સ હાઈ એલર્ટ પર છે. ઈઝરાયેલના સૂત્રોએ દાવો કર્યો છે કે સરહદમાં પ્રવેશતા પહેલા ૧૦૦ ડ્રોનને રોકવામાં આવ્યા હતા. તે જ સમયે, જોર્ડન, ઇરાક અને લેબનોને તેમની એરસ્પેસ બંધ કરી દીધી હતી. ઈરાનના ડ્રોન હુમલા પર ઈઝરાયેલના વડાપ્રધાન બેન્જામિન નેતન્યાહુએ કહ્યું કે ઈઝરાયેલની સેના ઈરાન સામે લડવા માટે તૈયાર છે. સેનાની સાથે સામાન્ય લોકો પણ મજબૂત છે.
તણાવ વચ્ચે જોર્ડન સહિત અનેક દેશોએ એરસ્પેસ બંધ કરી દીધી છે. વિમાનોને એરસ્પેસમાં પ્રવેશ ન કરવાનો આદેશ છે. ઈરાની ડ્રોન હુમલા પર ઈઝરાયેલી સેનાએ કહ્યું કે અમે કોઈપણ પ્રકારના હુમલાનો સામનો કરવા માટે તૈયાર છીએ. સૂત્રોના જણાવ્યા પ્રમાણે ઈરાન પર ટૂંક સમયમાં હવાઈ હુમલો થઈ શકે છે. ઈઝરાયેલની વાયુસેનાની તૈયારીઓ જોરદાર છે. ઈરાન સામે જવાબી કાર્યવાહી કરવાની તૈયારી ચાલી રહી છે. ઈઝરાયલ અનુસાર ઈઝરાયલના મિલિટરી બેસને નુક્સાન થયું છે. ઈઝરાયલની સેનાએ કહ્યું કે અમે ઈરાનમાં કેટલાક ડ્રોન ઉડતા જોયા છે, જેને અહીં પહોંચવામાં થોડા કલાકો લાગશે. ઈરાનની સેનાએ લગભગ ૨૦૦ ડ્રોન અને મિસાઈલોથી ઈઝરાયલ પર હુમલો કરવાનું શરૂ કરી દીધું છે. ઈઝરાયલની સેનાએ શનિવારે મોડી રાત્રે આ હુમલાની જાણકારી આપી હતી. અમેરિકી સેનાએ કેટલાક ડ્રોન તોડી પાડ્યા છે. તે જ સમયે ઈઝરાયલના આયર્ન ડોમે ઈરાન દ્વારા છોડવામાં આવેલી મિસાઇલોને અટકાવી દીધી હતી.
ઈઝરાયલની એક ન્યૂઝ ચેનલે અહેવાલ આપ્યો છે કે ઈરાને ડ્રોન હુમલા શરૂ કર્યા છે. અહીં માહોલ તંગ બન્યો છે. સીરિયા અને જોર્ડનમાં કેટલાક ડ્રોનને ઠાર કરવામાં આવ્યા છે. જોકે, ૧ એપ્રિલના રોજ ઇઝરાયલે સીરિયામાં ઈરાની એમ્બેસી નજીક હવાઈ હુમલો કર્યો હતો. જેમાં ઈરાનના બે ટોચના આર્મી કમાન્ડર સહિત ૧૩ લોકો માર્યા ગયા હતા. આ પછી ઈરાને બદલો લેવા ઈઝરાયલ પર હુમલો કરવાની ધમકી આપી હતી. તણાવ વચ્ચે નાટોના સભ્ય તુર્કીએ કહ્યું છે કે તે ઈરાન વિરુદ્ધ તેની એરસ્પેસનો ઉપયોગ કરવા દેશે નહીં.