સ્કોટલેન્ડ, હરિકેન કેથલીન યુનાઇટેડ કિંગડમના દરિયાકાંઠે ત્રાટક્યું હતું. આ કારણે દેશના મોટા ભાગોમાં ભારે પવન ફૂંકાવાથી અસર થઈ હતી. સવારે ૮ વાગ્યાથી રાત્રે ૧૦ વાગ્યા સુધી ઈંગ્લેન્ડના ઉત્તર-પશ્ચિમ અને દક્ષિણ-પશ્ચિમ , ઉત્તરી આયર્લેન્ડ અને સ્કોટલેન્ડ માટે યલો એલર્ટ જારી કરવામાં આવ્યું હતું. આ દરમિયાન ૭૦ માઈલ પ્રતિ કલાકની ઝડપે પવન ફૂંકાશે તેવી પણ આગાહી કરવામાં આવી હતી. ચક્રવાત કેથલીનને કારણે પહેલા યુકે એરપોર્ટ પર ઉપડતી અને પહોંચતી લગભગ ૭૦ ફ્લાઈટ્સ રદ કરવામાં આવી હતી. જેના કારણે ઘણી ફ્લાઈટ્સ પણ ડાયવર્ટ કરવામાં આવી હતી.
અહેવાલ મુજબ, બેલફાસ્ટ સિટી એરપોર્ટથી ફ્લાઈટ્સ પણ રદ કરવામાં આવી હતી. ઉપરાંત, ઘણી બ્રિટિશ એરવેઝ અને એર ફ્રાન્સ સેવાઓ પણ હાલ માટે રદ કરવામાં આવી છે. નિષ્ણાતોના મતે સમગ્ર બ્રિટનમાં વધતા તાપમાનનું કારણ આ વાવાઝોડું છે. મેટ ઓફિસના હવામાન શાસ્ત્રી એલી ગ્લેસિયરે ધ ગાર્ડિઅન સાથે વાત કરતા કહ્યું કે તાપમાનમાં વધારો વાવાઝોડાને કારણે થયો છે. કારણ કે તોફાનનું સ્થાન યુકેના પશ્ચિમ તરફ છે. તેણે કહ્યું કે તે ખંડમાંથી ગરમ તાપમાન લાવી રહ્યું છે. આનો અર્થ એ છે કે યુકેમાં તાપમાન ૨૨ ડિગ્રી સેલ્સિયસ સુધી પહોંચી શકે છે.
કેથલીન તોફાનને કારણે સમગ્ર સ્કોટલેન્ડમાં ટ્રેન સેવાઓ ખોરવાઈ ગઈ હતી. નેટવર્ક રેલ સ્કોટલેન્ડે બપોરથી કેટલાક મુખ્ય માર્ગો પર ટ્રેનની ગતિ ધીમી કરવાનો નિર્ણય કર્યો. આ ઉપરાંત રેલવે મુસાફરોને પણ સલાહ આપવામાં આવી છે કે તેઓ મુસાફરી કરતા પહેલા તેમના રૂટ ચેક કરે. કેથલીન તોફાનના કારણે યુકેમાં જોરદાર પવનો જોવા મળી રહ્યા છે. આ દરમિયાન આયર્લેન્ડમાં પણ લોકોને પાવર કટનો સામનો કરવો પડ્યો હતો. આ સમયગાળા દરમિયાન, આયર્લેન્ડમાં હજારો ઘરોની વીજળી કાપી નાખવામાં આવી હતી. વાવાઝોડાને કારણે ક્રેન લઈને જતી એક લારી રોડ પર પડી હતી. તેમજ વાવાઝોડાના કારણે અનેક વિસ્તારોમાં પાણી ભરાઈ ગયા હતા.