શિમલા, હિમાચલ પ્રદેશ વિધાનસભાના બજેટ સત્ર દરમિયાન વ્હીપનું ઉલ્લંઘન કરવા બદલ સ્પીકરે કોંગ્રેસના છ ધારાસભ્યોને ગેરલાયક ઠેરવ્યા છે. હવે આ ૬ બળવાખોર ધારાસભ્યોએ સુપ્રીમ કોર્ટનો સંપર્ક કર્યો છે. કોંગ્રેસના આ ધારાસભ્યોએ તેમને ગેરલાયક ઠેરવવાના સ્પીકરના નિર્ણયને પડકાર્યો છે. વિધાનસભામાં બજેટ દરમિયાન તેમની ગેરહાજરીના આધારે સ્પીકરે આ ધારાસભ્યોને ગેરલાયક ઠેરવ્યા હતા. સ્પીકરના આ નિર્ણય સામે ધારાસભ્યોએ વાંધો ઉઠાવ્યો છે. બળવાખોર ધારાસભ્યોએ સ્પીકરના નિર્ણયને ખોટો ગણાવ્યો છે અને તેને રદ કરવાની માંગ કરી છે.
કોંગ્રેસના બળવાખોરો સુધીર શર્મા, રાજીન્દર રાણા, ઈન્દર દત્ત લખનપાલ, રવિ ઠાકુર, દેવેન્દ્ર ભુટ્ટો અને ચૈતન્ય શર્માએ સુપ્રીમ કોર્ટમાં અરજી દાખલ કરી છે. અરજીમાં હિમાચલ પ્રદેશ વિધાનસભાના અધ્યક્ષ કુલદીપ સિંહ પઠાનિયાના નિર્ણયને પડકારવામાં આવ્યો છે, જેમાં તેમણે આ તમામ ૬ કોંગ્રેસના ધારાસભ્યોને વિધાનસભાના સભ્યપદેથી ગેરલાયક ઠેરવ્યા છે. ટ્રિબ્યુનલના અધ્યક્ષ તરીકે વિધાનસભા અધ્યક્ષ આ નિર્ણય લીધો છે.
પક્ષપલટા વિરોધી કાયદા હેઠળ સભ્યપદ ગુમાવનારા આ ધારાસભ્યોએ તેમને ગેરલાયક ઠેરવવાના નિર્ણયને પડકાર્યો છે. હિમાચલ પ્રદેશ સરકારમાં સંસદીય બાબતોના પ્રધાન અને કોંગ્રેસ વિધાનમંડળ પક્ષના મુખ્ય દંડક હર્ષવર્ધન ચૌહાણે હિમાચલ પ્રદેશ વિધાનસભાના અધ્યક્ષને ફરિયાદ કરી હતી. આ ફરિયાદમાં વ્હીપ જારી હોવા છતાં આ તમામ ૬ ધારાસભ્યો કટ મોશન અને બજેટ પાસિંગ દરમિયાન ગેરહાજર હોવાનું જણાવાયું હતું. આ ધારાસભ્યોએ વિધાનસભાના હાજરી રજિસ્ટરમાં તેમની હાજરી ચિહ્નિત કરી હતી, પરંતુ તે સમયે તેઓ ગૃહમાં હાજર ન હતા. આ અંગે ચુકાદો આપતાં વિધાનસભા અધ્યક્ષે તેમને અયોગ્ય જાહેર કર્યા છે.
હિમાચલ પ્રદેશ વિધાનસભાના સભ્યપદેથી ગેરલાયક ઠેરવવામાં આવેલા આ ધારાસભ્યોનું કહેવું છે કે સ્પીકરે તેમને તેમના વિચારો રજૂ કરવા માટે સમય આપ્યો નથી. આ સિવાય માત્ર એક ધારાસભ્યને નોટિસ મળી છે, અન્ય ધારાસભ્યોને નોટિસ આપવામાં આવી નથી. ધારાસભ્યોના વકીલે એમ પણ કહ્યું હતું કે સ્પીકરે એવો નિર્ણય લીધો જાણે અરજીમાં લખેલું બધું સાચું હોય. હવે આ ધારાસભ્યોને સુપ્રીમ કોર્ટ પાસેથી રાહતની અપેક્ષા છે. જો તેમને સુપ્રીમ કોર્ટમાંથી રાહત નહીં મળે તો આ તમામ ૬ વિધાનસભા બેઠકો પર પેટાચૂંટણી યોજાશે.