નવીદિલ્હી,વડા પ્રધાન નરેન્દ્ર મોદીએ મંગળવારે બ્રિટનના રાજા ચાર્લ્સ ત્રીજાના ઝડપથી સ્વસ્થ થવાની શુભેચ્છા પાઠવી હતી. ચાર્લ્સને કેન્સર હોવાનું નિદાન થયું છે. લંડનમાં બ્રિટનના શાહી પરિવારના સત્તાવાર નિવાસસ્થાન બકિંગહામ પેલેસે સોમવારે એક નિવેદન જારી કરીને માહિતી આપી હતી કે કિંગ ચાર્લ્સ કેન્સરથી પીડિત છે. કિંગ ચાર્લ્સના શરીરના કયા ભાગમાં કેન્સર છે તેની માહિતી આપવામાં આવી નથી.
સોશિયલ મીડિયા પર શેર કરેલી પોસ્ટમાં વડાપ્રધાને લખ્યું, ’હું, ભારતના લોકો સાથે, રાજા ચાર્લ્સ ત્રીજાના ઝડપી સ્વસ્થ અને સારા સ્વાસ્થ્ય માટે પ્રાર્થના કરું છું.’ બકિંગહામ પેલેસ દ્વારા જારી કરવામાં આવેલા નિવેદનમાં કહેવામાં આવ્યું છે કે ૭૫ વર્ષીય રાજા ચાર્લ્સને કેન્સર છે અને તેમની સારવાર શરૂ થઈ ગઈ છે. રાજા ચાર્લ્સની તમામ જાહેર સભાઓ મુલતવી રાખવામાં આવી છે. ગયા મહિને જ કિંગ ચાર્લ્સની પ્રોસ્ટેટ સર્જરી થઈ હતી. તપાસ દરમિયાન તેમના શરીરમાં અન્ય કોઈ બીમારીના લક્ષણો જોવા મળ્યા, ત્યારબાદ વધુ ટેસ્ટ કરવામાં આવ્યા અને કેન્સરની પુષ્ટિ થઈ.