નવીદિલ્હી, લોક્સભાની વિશેષાધિકાર સમિતિ ત્રણ કોંગ્રેસના સભ્યોને ગૃહમાંથી સસ્પેન્ડ કરવાના મુદ્દા પર વિચારણા કરશે. આવતા અઠવાડિયે બોલાવવામાં આવેલી બેઠકમાં સાંસદોના સસ્પેન્શન અંગે મહત્વનો નિર્ણય લેવામાં આવે તેવી શક્યતા છે. બીજેપી સાંસદ સુનિલ કુમાર સિંહ પેનલના અધ્યક્ષ છે. ૧૨ જાન્યુઆરીએ સમિતિની બેઠકમાં કોંગ્રેસના ત્રણ સાંસદો કે જયકુમાર, અબ્દુલ ખાલિક અને વિજયકુમાર વિજય વસંતના નિવેદનો નોંધવામાં આવશે. ૧૮ ડિસેમ્બરે ત્રણેયને સંસદમાં અભદ્ર વર્તનના આરોપમાં સ્પીકર ઓમ બિરલાએ સસ્પેન્ડ કરી દીધા હતા.
અહેવાલો અનુસાર, ૧૨ જાન્યુઆરીની બેઠક દરમિયાન ’ગૃહમાં ગંભીર અવ્યવસ્થા’ ઊભી કરવાનો આરોપ લગાવનાર ત્રણ કોંગ્રેસી સાંસદોએ લોક્સભાની વિશેષાધિકાર સમિતિ સમક્ષ મૌખિક પુરાવા રેકોર્ડ કરવાના રહેશે. તમને જણાવી દઈએ કે સંસદના શિયાળુ સત્ર દરમિયાન વિપક્ષના ૧૦૦ સાંસદોને સસ્પેન્ડ કરવામાં આવ્યા હતા. સસ્પેન્ડ કરાયેલા સાંસદો ૧૩ ડિસેમ્બરે સંસદની સુરક્ષામાં ક્ષતિ અંગે ગૃહ પ્રધાન અમિત શાહ અથવા વડા પ્રધાન મોદી પાસેથી ગૃહમાં નિવેદનની માંગ કરી રહ્યા હતા.
સ્પીકર ઓમ બિરલાએ પ્લેકાર્ડ સાથે ગૃહમાં આવવા અને કૂવામાં ઘૂસીને સૂત્રોચ્ચાર કરવા પર નારાજગી વ્યક્ત કરી હતી. મડાગાંઠનો અંત ન આવતાં બે દિવસમાં કુલ ૧૦૦ સાંસદોને સસ્પેન્ડ કરવામાં આવ્યા હતા. સ્પીકર દ્વારા લેવામાં આવેલા કડક પગલા મુજબ, ૯૭ સભ્યોને સમગ્ર શિયાળુ સત્રમાંથી સસ્પેન્ડ કરવામાં આવ્યા હતા, જ્યારે કે જયકુમાર, અબ્દુલ ખાલિક અને વિજયકુમાર વિજય વસંતનો કેસ વિશેષાધિકાર સમિતિને મોકલવામાં આવ્યો હતો. ત્રણેય પર પ્રિસાઇડિંગ ઓફિસરની ખુરશી સુધી પહોંચવાનો આરોપ છે. કાર્યવાહી અનુસાર, ત્રણ સભ્યોનું સસ્પેન્શન ત્યાં સુધી ચાલુ રહેશે જ્યાં સુધી કમિટી પોતાનો રિપોર્ટ લોક્સભા સ્પીકરને સુપરત નહીં કરે.