રામપુર, સપાના વરિષ્ઠ નેતા આઝમ ખાનને વધુ એક ઝટકો લાગ્યો છે. યુપી સરકારે આઝમ ખાનની Y-કેટેગરીની સુરક્ષા પાછી ખેંચી લીધી છે. રામપુર એસપી દ્વારા Y-કેટેગરીના ગનર અને નિવાસસ્થાન પર તૈનાત ગાર્ડને પોલીસ લાઇનમાં પાછા બોલાવવામાં આવ્યા છે. વીવીઆઈપીની સુરક્ષાને લઈને ગયા વર્ષે ૮ નવેમ્બરે રાજ્ય સ્તરની સુરક્ષા સમિતિની બેઠક મળી હતી. જેમાં કમિટીએ કહ્યું હતું કે આઝમ ખાન માટે વાય કેટેગરીની સુરક્ષા જાળવવાનું કોઈ ઔચિત્ય નથી. આ રિપોર્ટના આધારે બુધવારે ગૃહ સચિવ વતી રામપુરના એસપી અશોક કુમાર શુક્લાને નિર્દેશ આપવામાં આવ્યો હતો.
એએસપી ડૉ. સંસાર સિંહે જણાવ્યું કે હવે આઝમ ખાન અને તેમના પરિવારના કોઈપણ સભ્યની કોઈ સુરક્ષા નથી. વીવીઆઇપી લીડરની સુરક્ષામાં વાય-કેટેગરીની સુરક્ષામાં કુલ ૧૧ જવાન તૈનાત છે. તેમાં બે કમાન્ડો અને બે પીએસઓ પણ હોય છે. સુરક્ષામાં રોકાયેલા ૩ ગનર્સ અને તેમના નિવાસસ્થાન પર તૈનાત ગાર્ડને રામપુર પોલીસ લાઇનમાં બોલાવવામાં આવ્યા છે. ૨૫ મેના રોજ નફરત ફેલાવતા ભાષણ કેસમાં આઝમ ખાનને મોટી રાહત મળી હતી. બુધવારે રામપુરની વિશેષ સાંસદ/ધારાસભ્ય કોર્ટે આઝમને નિર્દોષ જાહેર કર્યો હતો. સાંસદ/ધારાસભ્ય કોર્ટની નીચલી અદાલતે આ કેસમાં આઝમને ૩ વર્ષની સજા ફટકારી હતી. સજા બાદ તેમની ધારાસભા જતી રહી હતી. આ પછી આ સીટ પર પેટાચૂંટણી યોજાઈ હતી, જેમાં આઝમ વિરુદ્ધ કેસ દાખલ કરનાર બીજેપી નેતા ધારાસભ્ય તરીકે ચૂંટાયા હતા.
એડવોકેટ ઝુબેર અહેમદે કહ્યું હતું કે આઝમને સાંસદ/ધારાસભ્ય અદાલતે નિર્દોષ જાહેર કર્યા છે. નીચલી અદાલતે જે પુરાવાઓને આધારે સજા સંભળાવી હતી તે પુરાવાઓને નકારી કાઢતાં ઉપલી અદાલતે લગભગ ૭ મહિના પછી આઝમને નિર્દોષ છોડી મૂક્યો હતો. આઝમને ૨૭ ઓક્ટોબર ૨૦૨૨ના રોજ નફરતભર્યા ભાષણ કેસમાં સજા સંભળાવવામાં આવી હતી. કોર્ટે આઝમ પર ૨૫,૦૦૦ રૂપિયાનો દંડ પણ ફટકાર્યો હતો. આ મામલો ૨૦૧૯નો છે. ત્યારે દેશમાં લોક્સભાની ચૂંટણી યોજાઈ રહી હતી.