ભુવનેશ્ર્વર, લોક્સભા ચૂંટણી માટે ચાર તબક્કાનું મતદાન થઈ ચૂક્યું છે અને હવે પાંચમા તબક્કાની લડાઈ તેજ થઈ ગઈ છે. ઓડિશાના બાલાંગિરમાં જનસભાને સંબોધતા રાહુલ ગાંધીએ ફરી એકવાર બંધારણ અને લોકશાહી બચાવવાનો નારો આપ્યો અને ગરીબોની ભાગીદારી વધારવા પર ભાર મૂક્યો. રાહુલ ગાંધીએ કહ્યું- અમે ક્રાંતિકારી કામ કરવા જઈ રહ્યા છીએ. આવું કામ આજ સુધી કોઈએ કર્યું નથી. તેમણે કહ્યું કે પીએમ મોદીએ ૨૨ લોકોને અબજોપતિ બનાવ્યા છે પરંતુ અમે કરોડો લોકોને કરોડપતિ બનાવીશું.
અહીં રાહુલ ગાંધીએ ફરી એકવાર દાવો કર્યો કે નરેન્દ્ર મોદી ૪ જૂન પછી વડાપ્રધાન નહીં બને. આ સાથે તેમણે કહ્યું કે ૪ જૂન પછી ભારતમાં ગઠબંધન સરકાર બનશે, અમારી સરકાર ગરીબો, મજૂરો અને જરૂરિયાતમંદ મહિલાઓની યાદી બનાવશે. તેમણે કહ્યું કે યાદી બને કે તરત જ અમારી ગેરંટી યોજના લાગુ કરવામાં આવશે.
આ દરમિયાન કોંગ્રેસ સાંસદ રાહુલ ગાંધીએ ફરી એકવાર ભાજપના નેતાઓ અને વડાપ્રધાન મોદી પર બંધારણ અને અનામતને ખતમ કરવાનો આરોપ લગાવ્યો છે. રાહુલ ગાંધીએ કહ્યું કે ભાજપ સરકારે વિદ્યાર્થીઓની લોન માફ કરી નથી, ખેડૂતોની લોન માફ કરી નથી, પરંતુ માત્ર તેના મિત્ર ઉદ્યોગપતિઓની લોન માફ કરી છે. તેમણે કહ્યું કે વડાપ્રધાન મોદી તેમના મિત્રો માટે જ કામ કરે છે. તેમની સરકારમાં દલિતો અને પછાત લોકોની વાત સાંભળવામાં આવી રહી નથી.
રાહુલ ગાંધીએ કહ્યું કે દેશમાં સૌથી વધુ વસ્તી ધરાવતા લોકોની પીડા અને જરૂરિયાતો પર આજે યાન આપવામાં આવતું નથી. રાહુલ ગાંધીએ કહ્યું કે આજે સામાન્ય જનતાનો અવાજ ઉઠાવવા દેવામાં આવી રહ્યો નથી. રાહુલે કહ્યું કે દિલ્હી સરકાર ૯૦ અધિકારીઓ ચલાવે છે પરંતુ અહીં માત્ર ત્રણ અધિકારીઓ પછાત વર્ગના છે, એક આદિવાસી અને ત્રણ દલિત છે. તેમણે કહ્યું કે તમામ સરકારી નિર્ણયોમાંથી નેવું ટકા અધિકારીઓ દ્વારા લેવામાં આવે છે. જેના કારણે ગરીબોને ન્યાય મળી રહ્યો નથી.
આ દરમિયાન રાહુલ ગાંધીએ કહ્યું કે આજે દેશમાં માત્ર મોટા લોકોની વાત સાંભળવામાં આવે છે, તમામ નીતિઓ તેમના અનુસાર બનાવવામાં આવે છે, પરંતુ કોંગ્રેસ પાર્ટી હવે તેમાં મોટા ફેરફાર લાવવા માટે તૈયાર છે. તેમણે કહ્યું કે આ સામાજિક પરિવર્તન માટે અમારી પાર્ટી સૌથી પહેલા જાતિની વસ્તી ગણતરીની માંગ કરે છે. રાહુલ ગાંધીએ કહ્યું કે, દેશમાં પ્રજાની સરકાર જાતિની વસ્તી ગણતરીથી જ શરૂ થશે.