લાહોર,પાકિસ્તાનના પૂર્વ વડાપ્રધાન ઈમરાન ખાને ફરી પોતાના પર હુમલાની શક્યતા વ્યક્ત કરી છે. લાહોર હાઈકોર્ટમાં અરજી દાખલ કરતી વખતે તેમણે કહ્યું- મારી હત્યા માટે ત્રીજી વખત ષડયંત્ર રચવામાં આવી રહ્યું છે. મારી સામે ચાલી રહેલા તમામ રાજકીય કેસો રદ કરવામાં આવે જેથી મારે વારંવાર કોર્ટમાં જવું ન પડે.ઇમરાને કહ્યું કે કોર્ટમાં વારંવાર આવવાના કારણે તેના જીવ પર જોખમ હોઈ શકે છે. ઈમરાન વિરુદ્ધ દેશભરમાં અલગ-અલગ શહેરોમાં લગભગ ૧૨૧ કેસ ચાલી રહ્યા છે. જેમાં દેશદ્રોહ, નિંદા, હિંસા ભડકાવવા, આતંકવાદ ફેલાવવા જેવા અનેક કેસ સામેલ છે. ઈમરાનના મતે, આ તમામ કેસ રાજકીય રીતે પ્રેરિત છે અને તેને હવે પૂરા કરી દેવા જોઈએ.
ઈમરાન ખાન ભારે સુરક્ષા વ્યવસ્થા વચ્ચે લાહોર હાઈકોર્ટ પહોંચ્યા હતા. અહીં તેણે સુનાવણી દરમિયાન જજ પાસેથી બોલવાની પરવાનગી માગી હતી. ખાને કોર્ટમાં કહ્યું- પંજાબના વજીરાબાદ અને ઈસ્લામાબાદ જ્યુડિશિયલ કોમ્પ્લેક્સમાં મારા પર પહેલા પણ હુમલા થઈ ચૂક્યા છે.આ બંને હુમલામાં હું બચી ગયો હતો તેથી આ લોકો મને ત્રીજી વખત મારી નાખવાનું કાવતરું ઘડી રહ્યા છે. સતત કોર્ટમાં આવવાના કારણે મારા જીવ પર જોખમ વધી જશે.
પૂર્વ પીએમએ કહ્યું- ૭૦ વર્ષથી મારી વિરુદ્ધ એક પણ વાર કેસ નોંધાયો નથી, પરંતુ ગયા વર્ષે એપ્રિલમાં સત્તા પરથી હટ્યા બાદ મારી વિરુદ્ધ સતત કેસ દાખલ કરવામાં આવી રહ્યા છે. ’ડૉન’ અનુસાર, પાંચ જજોની બેન્ચે ખાનને તમામ મામલામાં પોલીસ તપાસમાં સહકાર આપવાનો આદેશ આપ્યો છે.ઈમરાને વીડિયો કોન્ફરન્સિંગ દ્વારા તપાસમાં સામેલ થવાની પરવાનગી માગી હતી, જેને કોર્ટે ફગાવી દીધી હતી. ઈમરાન સામે હવે ૮ મેના રોજ ફરી સુનાવણી થશે.૩ નવેમ્બર, ૨૦૨૨ના રોજ હુમલા બાદ ઈમરાન જ્યારે પહેલીવાર મીડિયાને મળ્યા ત્યારે તેઓ વ્હીલચેરમાં જોવા મળ્યા હતા.
આ પહેલા ઈમરાને એક વીડિયો દ્વારા જણાવ્યું હતું કે ૬ લોકો તેમની હત્યાનું કાવતરું ઘડી રહ્યા છે. તેમાંથી પૂર્વ પીએમએ વજીરાબાદ હુમલા બાદ ૩ વિરુદ્ધ એફઆઇઆર નોંધાવી હતી. ખાને વડા પ્રધાન શહેબાઝ શરીફ, ગૃહ પ્રધાન રાણા સનાઉલ્લાહ અને ટોચના આઇએસઆઇ અધિકારી મેજર જનરલ ફૈઝલ નસીરને તેમની હત્યાનું કાવતરું ઘડવાનો આરોપ મૂક્યો હતો.
૩ નવેમ્બરે વજીરાબાદમાં એક રેલી દરમિયાન ઈમરાન ખાન પર જીવલેણ હુમલો થયો હતો. આ દરમિયાન શૂટર નાવેદ મેહરની ધરપકડ કરવામાં આવી હતી. અન્ય ત્રણ શૂટર્સ કોણ હતા અને તેઓએ કઈ બંદૂકથી ફાયરિંગ કર્યું હતું તે જાણી શકાયું નથી. આ હુમલામાં કુલ ૧૩ લોકો ઘાયલ થયા છે. જ્યારે ખાન પર હુમલો થયો ત્યારે તે પોતાના સમર્થકો સાથે એક કન્ટેનર પર ઉભા હતા. ત્યારબાદ કન્ટેનરની એકદમ નજીક ઉભેલા હુમલાખોર નાવેદે એકે-૪૭ વડે ગોળીબાર કર્યો હતો. ખાનને પગમાં ત્રણ ગોળી વાગી હતી.