નવીદિલ્હી, કેન્દ્રીય મંત્રી આરકે સિંહે મોદી સરકારની ઉપલબ્ધિઓ ગણાવતા કહ્યું કે અમે માત્ર દેશના ગરીબો માટે જ કામ નથી કર્યું પરંતુ દેશને આધુનિક પણ બનાવ્યો છે. તેમણે કહ્યું કે વડાપ્રધાન નરેન્દ્ર મોદીનું લક્ષ્ય ૨૦૪૭ સુધીમાં ભારતને વિકસિત રાષ્ટ્ર બનાવવાનું છે. સાથે જ તેમણે કહ્યું કે ભારત ૨૦૧૪ પહેલા જે હતું તેનાથી સંપૂર્ણપણે અલગ છે. આ સાથે તેમણે વીજળીના ક્ષેત્રમાં ભારતની પ્રગતિની સાથે સાથે ઈન્ફ્રાસ્ટ્રક્ચરને લઈને કેન્દ્ર સરકારના કામોની પણ ગણતરી કરી. સાથે સરકારની ભાવિ યોજનાઓની માહિતી આપતા કહ્યું કે સરકારનું લક્ષ્ય ૨૦૩૦ સુધીમાં દેશમાં ૮૦૦ વંદે ભારત ટ્રેન ચલાવવાનું છે.
સિંહે કહ્યું કે અમે દેશને વિજળીની ખોટમાંથી પાવર સરપ્લસ તરફ લઈ ગયા છીએ અને દરેક ઘરમાં વીજળી પહોંચાડી છે. તેમણે કહ્યું કે ૪૩ ટકા રિન્યુએબલ એનર્જી બિન-અશ્મિમાંથી છે. આ સાથે તેમણે કહ્યું કે ગ્રીન હાઇડ્રોજન અને ગ્રીન એમોનિયામાં આપણે વિશ્ર્વમાં સૌથી આગળ છીએ.
આ સાથે તેમણે ઈન્ફ્રાસ્ટ્રક્ચરની ઉપલબ્ધિઓ ગણાવતા કહ્યું કે આધુનિક ઈન્ફ્રા વગર આપણે વિકસિત દેશ બની શકીએ નહીં. તેમણે જણાવ્યું કે ૨૦૧૪ પહેલા હાઈવેની કુલ લંબાઈ લગભગ ૯૧૦૦૦ કિમી હતી જે હવે લગભગ ૧ લાખ ૪૫ હજાર કિમી થઈ ગઈ છે. ફોર લેન હાઈવેની ક્ષમતા ૨૦૧૪ પહેલાની સરખામણીમાં લગભગ અઢી ગણી વધી છે. તેમણે એમ પણ કહ્યું કે વંદે ભારત ટ્રેનના ૨૫ સેટ હાલમાં પાટા પર છે અને આ વર્ષના અંત સુધીમાં ૧૫૦ સેવાઓ (૭૫ ટ્રેન સેટ) ચલાવવાનું લક્ષ્ય છે.
ભવિષ્યની યોજનાઓનું વર્ણન કરતાં તેમણે કહ્યું કે ૨૦૩૦ સુધીમાં દેશમાં ૮૦૦ વંદે ભારત ટ્રેન ચલાવવાનું લક્ષ્ય છે. ઉપરાંત, તેમણે કહ્યું કે અમે ૨૦૧૪ પહેલા કરતા ૧૫૦ ટકા વધુ સામાન લોડ કર્યો છે. તેમણે જણાવ્યું કે ૯૧ ટકા બ્રોડગેજ નેટવર્કનું વીજળીકરણ થઈ ગયું છે. આ વર્ષના અંત સુધીમાં સમગ્ર રેલ્વે નેટવર્કનું વીજળીકરણ થઈ જશે.
એર ટ્રાફિક અંગે તેમણે કહ્યું કે જ્યાં પહેલા ૭૪ એરપોર્ટ હતા, આ સરકારે તેને વધારીને ૧૪૮ કરી દીધા છે. જ્યાં પહેલા હવાઈ મુસાફરી કરનારા લોકોની સંખ્યા ૬.૧૦ કરોડ હતી તે આજે વધીને ૧૩.૬૦ કરોડ થઈ ગઈ છે.
આ સાથે તેમણે જણાવ્યું કે આ સરકારમાં ૨૪ કરોડ નવા મોબાઈલ ગ્રાહકો બન્યા છે અને મોબાઈલ બ્રોડબેન્ડ ગ્રાહકોની સંખ્યામાં ૧૭ ગણો વધારો થયો છે. જ્યારે 5G સેવાઓ ૭૦૦ થી વધુ જિલ્લાઓમાં ઉપલબ્ધ છે. ભારતે વિશ્ર્વમાં સૌથી ઝડપી 5G રજૂ કર્યું છે.
ટેલિકોમ સચિવ વીએલ કાંથા રાવે કહ્યું કે આગામી ૧૨ મહિનામાં દેશના દરેક વિસ્તારમાં 4G નેટવર્ક હશે. સર્વેમાં જાણવા મળ્યું છે કે ૨૫ હજાર ગામડાઓમાં ૪જી કે 3G નેટવર્ક પણ ઉપલબ્ધ નથી. તે જ સમયે, રેલ્વેના અધિક સચિવ એકે ખંડેલવાલે કહ્યું કે ૨૦૨૭ માં ગુજરાત સેક્શનમાં બુલેટ ટ્રેનની ટ્રાયલ શરૂ કરવાની યોજના છે.