- સુપ્રીમમાં ઓળખ કાર્ડ બતાવ્યા વિના ૨૦૦૦ની નોટ બદલવા વિરુદ્ધની અરજી
નવીદિલ્હી, સુપ્રીમ કોર્ટે ઓળખ કાર્ડ બતાવ્યા વિના ૨ હજાર રૂપિયાની નોટ બદલવા વિરુદ્ધની અરજી પર તાત્કાલિક સુનાવણી કરવાનો ઇનકાર કરી દીધો છે. વાત જાણે એમ છે કે, સુપ્રીમ કોર્ટની વેકેશન બેન્ચે કહ્યું કે, આ એવો મામલો નથી કે જેની તાત્કાલિક સુનાવણી કરવાની જરૂર છે. અરજદારે ઉનાળાના વેકેશન પછી ચીફ જસ્ટિસ પાસે સુનાવણીની વિનંતી કરવી જોઈએ. નોંધનીય છે કે, આ પહેલા દિલ્હી હાઈકોર્ટે આ અરજી ફગાવી દીધી હતી. અરર્જીક્તાઓ તેને પડકારવા માટે સુપ્રીમ કોર્ટમાં પહોંચ્યા છે.
પિટિશનર વકીલ અશ્ર્વિની ઉપાધ્યાયનું કહેવું છે કે, નોટ બદલનારની ઓળખની ખરાઈ કર્યા વિના જ ભ્રષ્ટાચારી અને રાષ્ટ્રવિરોધી તત્વોને નોટો બદલીને ફાયદો થઈ રહ્યો છે. ૨૯ મેના રોજ દિલ્હી હાઈકોર્ટે અરજીને નીતિ વિષયક ગણાવીને ફગાવી દીધી હતી. સુપ્રીમ કોર્ટના જસ્ટિસ સુધાંશુ ધુલિયા અને કે.વી. વિશ્ર્વનાથનની બેન્ચ સમક્ષ તેમની અરજી મૂક્તા ઉપાધ્યાયે દલીલ કરી હતી કે, રિઝર્વ બેંકનો નિર્ણય મનસ્વી છે. હાઈકોર્ટે મંજૂર કરીને ખોટું કર્યું છે. પરંતુ ન્યાયાધીશોએ ઉપાધ્યાયની અપીલ પર તરત જ સુનાવણી કરવાનો ઇનકાર કરી દીધો હતો.
આ સાથે અરજીમાં કહેવામાં આવ્યું છે કે, ૩ લાખ કરોડ રૂપિયાથી વધુ મૂલ્યની ૨,૦૦૦ રૂપિયાની નોટો ભ્રષ્ટાચાર, માફિયા અથવા રાષ્ટ્ર વિરોધી શક્તિઓ પાસે હોવાની સંભાવના છે. આવા સંજોગોમાં આવા તત્વો ઓળખ કાર્ડ જોયા વગર જ નોટ બદલીને ફાયદો ઉઠાવી રહ્યા છે.
અરજદારે કહ્યું છે, ભારતમાં આજે એવો કોઈ પરિવાર નથી કે જેનું બેંક ખાતું ન હોય. તેથી ૨૦૦૦ રૂપિયાની નોટ સીધી બેંક ખાતામાં જમા કરાવવી જોઈએ. એ પણ સુનિશ્ર્ચિત કરવું જોઈએ કે, વ્યક્તિ ફક્ત પોતાના ખાતામાં જ નોટો જમા કરાવી શકે અને કોઈ બીજાના ખાતામાં નહીં.
દિલ્હી હાઈકોર્ટમાં દલીલો દરમિયાન રિઝર્વ બેંકે અરજીનો વિરોધ કર્યો હતો. રિઝર્વ બેંક તરફથી હાજર રહેલા વરિષ્ઠ વકીલ પરાગ ત્રિપાઠીએ ૧૯૮૧ના ’આરકે ગર્ગ વિરુદ્ધ યુનિયન ઓફ ઈન્ડિયા’ કેસના નિર્ણયનો ઉલ્લેખ કર્યો હતો. તેમની દલીલ એવી હતી કે, કોર્ટ નાણાકીય નીતિમાં દખલ ન કરી શકે. ત્રિપાઠીએ કહ્યું હતું કે, નોટો જાહેર કરવાનો અને પરત મેળવવાનો અધિકાર રિઝર્વ બેંકનો છે. કોર્ટે આમાં દખલ ન કરવી જોઈએ.