નવીદિલ્હી,
થોડા દિવસો પહેલા જી-૨૦ના નેતાઓ ઈન્ડોનેશિયાની રાજધાની બાલીમાં એકઠા થયા હતા. આ દરમિયાન ઉર્જા સંકટ, રશિયા-યુક્રેન યુદ્ધ, વૈશ્વિક અર્થવ્યવસ્થા સહિત અનેક મુદ્દાઓ પર ચર્ચા થઈ હતી. વ્હાઇટ હાઉસે કહ્યું કે જી-૨૦ સમિટની બાલી ઘોષણા પરની વાટાઘાટોમાં ભારતે મહત્વની ભૂમિકા ભજવી હતી. તેમણે પીએમ મોદીના નિવેદન ‘આજનો યુગ યુદ્ધનો ન હોવો જોઈએ’ના વખાણ કર્યા હતા. રશિયા-યુક્રેન યુદ્ધ આ વર્ષે ફેબ્રુઆરીમાં શરૂ થયું હતું. આ પછી, પ્રથમ વખત, વિશ્ર્વની ટોચની અર્થવ્યવસ્થા ધરાવતા ૨૦ દેશોના રાષ્ટ્રાયક્ષો ભેગા થયા હતા.
વ્હાઇટ હાઉસના પ્રેસ સેક્રેટરી કારેન જીન-પિયરે જણાવ્યું હતું કે સમિટની ઘોષણા પર વાટાઘાટો કરવામાં ભારતે મહત્વની ભૂમિકા ભજવી હતી. વડાપ્રધાન મોદીએ સ્પષ્ટ કર્યું કે આજનો યુગ યુદ્ધનો ન હોવો જોઈએ. તેમણે જણાવ્યું હતું કે, અમારી પાસે અન્ય પ્રાથમિક્તાઓ વચ્ચે સ્થિતિસ્થાપક વૈશ્વિક અર્થવ્યવસ્થાના નિર્માણ માટેના અમારા પ્રયાસો ચાલુ રાખીને વર્તમાન ખાદ્ય અને ઉર્જા સુરક્ષા પડકારોને પહોંચી વળવાનો માર્ગ છે.
સમિટમાં પીએમ મોદીએ ભારપૂર્વક કહ્યું હતું કે, “મેં વારંવાર કહ્યું છે કે આપણે યુક્રેનમાં યુદ્ધવિરામનો રસ્તો શોધીને કૂટનીતિના માર્ગ પર પાછા ફરવું પડશે.” છેલ્લી સદીમાં બીજા વિશ્ર્વયુદ્ધે વિશ્ર્વમાં તબાહી મચાવી હતી. જે બાદ તે સમયના આગેવાનોએ શાંતિનો માર્ગ અપનાવવાનો ગંભીર પ્રયાસ કર્યો હતો. હવે આપણો વારો છે.
જી ૨૦ સમિટની જાહેરાતમાં મોદીનો નો વોરનો સંદેશ ગુંજ્યો. સમિટ પછી સંયુક્ત ઘોષણામાં, નેતાઓએ યુક્રેન પર રશિયન આક્રમણની નિંદા કરી અને યુક્રેનિયન પ્રદેશમાંથી તેના સંપૂર્ણ અને બિનશરતી ખસી જવા હાકલ કરી. નિવેદનમાં કહેવામાં આવ્યું છે કે જી-૨૦ સુરક્ષા મુદ્દાઓને ઉકેલવા માટેનું મંચ નથી તે સ્વીકારતા, સુરક્ષા મુદ્દાઓ પણ વૈશ્વિક અર્થતંત્ર માટે મહત્વપૂર્ણ પરિણામો લાવી શકે છે.
ઇન્ડોનેશિયાના બાલીમાં જી-૨૦ સમિટમાં ભાગ લીધા બાદ અમેરિકાના રાષ્ટ્રપતિ જો બાયડેન ગુરુવારે પરત ફર્યા હતા. ભારત ડિસેમ્બરમાં જી-૨૦નું પ્રમુખપદ સંભાળશે. ગ્રુપના તમામ સભ્યો અને આંતરરાષ્ટ્રીય સમુદાયનું કહેવું છે કે જી-૨૦ના ઈતિહાસમાં ભારતનું પ્રમુખપદ મહત્વપૂર્ણ સાબિત થશે. “વડાપ્રધાન મોદીના સંબંધો આ પરિણામ માટે મહત્વપૂર્ણ હતા અને અમે આવતા વર્ષે ભારતના જી ૨૦ પ્રમુખપદ દરમિયાન સહયોગની આશા રાખીએ છીએ,” પિયરે કહ્યું. અમે આગામી મીટિંગની રાહ જોઈ રહ્યા છીએ. તેમણે કહ્યું કે બિડેને સમિટની સાથે જ મોદી અને ઈન્ડોનેશિયાના રાષ્ટ્રપતિ જોકો વિડોડો સાથે વાત કરી.