ઢાકા,બાંગ્લાદેશના નવા ચૂંટાયેલા રાષ્ટ્રપતિ મોહમ્મદ શહાબુદ્દીને ભારતને રોહિંગ્યા સમુદાયને પરત લેવા માટે મ્યાનમારને સમજાવવા માટે અસરકારક પગલાં ભરવા વિનંતી કરી હતી. વર્ષ ૨૦૧૭ માં, રખાઈન પ્રાંતમાં મ્યાનમારની સેનાની કાર્યવાહી પછી, લગભગ ૧૦ લાખ રોહિંગ્યા મુસ્લિમો ત્યાંથી ભાગી ગયા છે અને બાંગ્લાદેશના કોક્સ બજારના કેમ્પમાં રહી રહ્યા છે.
રાષ્ટ્રપતિના સત્તાવાર નિવાસસ્થાનના પ્રવક્તાએ અહીં પત્રકારોને જણાવ્યું કે, રાષ્ટ્રપતિએ બાંગ્લાદેશમાં ભારતીય હાઈ કમિશનર પ્રણય કુમાર વર્મા સાથે અહીં બંગભવન ખાતે મુલાકાત દરમિયાન આ વિનંતી કરી હતી. ૭૩ વર્ષીય શહાબુદ્દીને મીટિંગમાં જણાવ્યું હતું કે બાંગ્લાદેશે માનવતાવાદી કારણોસર રોહિંગ્યા સમુદાયને આશ્રય આપ્યો હતો, પરંતુ તેમના લાંબા સમય સુધી અહીં રહેવાથી માત્ર બાંગ્લાદેશ માટે જ નહીં પરંતુ સમગ્ર ક્ષેત્ર માટે સમસ્યા ઊભી થઈ રહી છે, જેમાં આતંકવાદ સહિતના વધતા જતા સુરક્ષા જોખમોને ટાંકવામાં આવ્યા છે.
ભારતે હંમેશા મ્યાનમારના રખાઈન રાજ્યમાંથી વિસ્થાપિત વ્યક્તિઓને કાયમી અને વહેલા પરત લાવવાનું આહ્વાન કર્યું છે અને આ મુદ્દાના ઉકેલ માટે બાંગ્લાદેશ અને મ્યાનમાર સાથે મળીને કામ કર્યું છે. આ પૃષ્ઠભૂમિમાં, શહાબુદ્દીને કહ્યું કે બાંગ્લાદેશ ભારત સાથેના તેના સંબંધોને ખૂબ મહત્વ આપે છે, જે ભૌગોલિક નિકટતા, સહિયારા ઇતિહાસ અને બલિદાનને કારણે ખૂબ નજીક છે. તેમણે વર્તમાન દ્વિપક્ષીય સંબંધોને મજબૂત અને અનન્ય ગણાવ્યા.
શહાબુદ્દીને બાંગ્લાદેશના મુક્તિ સંગ્રામમાં પણ ભાગ લીધો હતો. તેમણે સ્વતંત્રતા યુદ્ધ દરમિયાન ૧૯૭૧માં ભારતમાં મળેલી તાલીમને પણ યાદ કરી. તેમણે કહ્યું કે બાંગ્લાદેશ અને ભારતના વડા પ્રધાનોએ તાજેતરમાં એકબીજાની મુલાકાત લીધી હતી અને તેમની મુલાકાતે બંને દેશો વચ્ચેના સંબંધોમાં એક નવો અયાય ખોલ્યો છે. ભારતીય રાજદૂતે શહાબુદ્દીને કહ્યું કે ભારતે બાંગ્લાદેશની આતંકવાદ પ્રત્યે ઝીરો ટોલરન્સની નીતિની પ્રશંસા કરી છે. તેમણે કહ્યું કે આનાથી ક્ષેત્રમાં સ્થિરતા આવી છે જે બંને દેશોના આથક વિકાસમાં સકારાત્મક યોગદાન આપી રહી છે.