પ્રયાગરાજની સરહદે લાખો શ્રદ્ધાળુઓ ફસાયા:સંગમમાં સ્નાન કરીને જ જઈશું, વહીવટીતંત્ર તેમને પાછા મોકલી રહ્યું છે; આસપાસના લોકો સહારો બન્યા

હું મંબઇથી આવ્યો છું. ટ્રેનો મોડી દોડી રહી છે. હું 4 દિવસથી કારમાં બેઠો છું. વહીવટીતંત્ર પાછા જવા માટે કહી રહ્યું છે. કેવી રીતે દૂર જવું? તેઓ અમને ચિત્રકૂટ પણ જવા દેતા નથી, જેથી હું ત્યાં રહીને એક-બે દિવસ પછી સ્નાન કરવા જાઉં. મારી સાથે મહિલા અને બાળકો પણ છે.

મહારાષ્ટ્રથી આવેલા ભક્ત આત્મારામ પાટીલની પણ આ જ મુશ્કેલીઓ છે. આત્મારામ બુંદેલખંડ એક્સપ્રેસ વે પર ચિત્રકૂટમાં ફસાયેલા છે. આત્મારામની જેમ ચિત્રકૂટના 25 કિલોમીટર લાંબા જામમાં લગભગ 2 લાખ શ્રદ્ધાળુ મૌની અમાવસ્યાના દિવસે પ્રયાગરાજ જવા માટે જામ ખૂલવાની રાહ જોતા હતા. પ્રયાગરાજ નજીક આવેલા 8 જિલ્લામાંથી આવતા રસ્તાઓની આ હાલત છે.

ઘણા ભક્તો તેમના ભૂખ્યા અને તરસ્યા પરિવારો સાથે રસ્તામાં ખોવાઈ ગયા, જ્યારે ઘણા હોટેલમાં રહેવા મજબૂર થયા. જ્યાં તેમને રોકવામાં આવ્યા હતા ત્યાં પાણી કે શૌચાલયની કોઈ વ્યવસ્થા નહોતી. લોકો ઠંડીમાં ખુલ્લામાં રાત વિતાવવા મજબૂર થયા. વહીવટીતંત્ર તેમને પાછા ફરવાનું કહી રહ્યું છે, પરંતુ તેઓ કહે છે કે જ્યારે તેઓ ઘરેથી નીકળ્યા તો સંગમમાં સ્નાન કરીને જ જશે.

પ્રયાગરાજ-ભદોહી-વારાણસી બોર્ડર પર 20 કિલોમીટર લાંબો જામ અને પ્રયાગરાજ-ચિત્રકૂટ બોર્ડર પર 10 કિલોમીટર લાંબો જામ હતો. પ્રયાગરાજ-કૌશાંબી બોર્ડર પર રોડથી પાર્કિંગ સુધી 50 હજાર વાહનો, તો પ્રયાગરાજ-પ્રતાપગઢ બોર્ડર પર 40 હજાર વાહનો ફસાયાં છે. પ્રયાગરાજ-જૌનપુર બોર્ડર, જૌનપુર જિલ્લાના બદલાપુર ખાતે પોલીસે પ્રયાગરાજ જતી તમામ બસોને રોકી હતી.

ચંદીગઢથી આવેલા લકી ઠાકુરે જણાવ્યું- મારે સવારથી જ ચાલવું પડ્યું છે. હું યુવાન છું, તેથી હું ચાલી રહ્યો છું. અહીં લોકોની ઘણી ભીડ છે. વૃદ્ધો અને મહિલાઓને ઘણી સમસ્યાઓનો સામનો કરવો પડી રહ્યો છે. જે શૌચાલય બનાવવામાં આવ્યાં છે તે પણ ઓછાં પડી રહ્યાં છે.

દિલ્હીથી આવેલા શત્રુઘ્ન કુમારે કહ્યું- અહીં કોઈ વાહન મળી રહ્યું નથી. હું લગભગ 18 કિ.મી. પગપાળા ચાલીને આવ્યો છું. હું ચિંતિત છું. સિનિયર સિટિઝનો પણ ચાલી રહ્યા છે. મારી સાથે મારાં માતા છે. જ્યાં અમને ઘાટ મળ્યો ત્યાં અમે મારી માતા સાથે સ્નાન કર્યું.

એ જ રીતે, અમે મહાકુંભ વિસ્તારમાં લગભગ 20 ભક્તો સાથે વાત કરી. ભક્તોએ જણાવ્યું કે સંગમમાં સ્નાન કરવા માટે તેમને સૌથી વધુ ચાલવું પડતું હતું. અમને વારંવાર અહીંથી ત્યાં મોકલવામાં આવ્યા. આ જ સમસ્યા હતી, હવે પાછા જવા માટે પણ મુશ્કેલીનો સામનો કરવો પડશે.

હવે સરહદી વિસ્તારોની સ્થિતિ વિશે વિગતવાર વાંચો…

1. વારાણસી-પ્રયાગરાજ રૂટની સ્થિતિ

20 કિમી લાંબો જામ, રૂટ પર 200થી વધુ બસો અટવાઈ

વારાણસીથી પ્રયાગરાજ જતાં તમામ વાહનોને ભદોહી બાબુ સરાઈ, ઔરાઈ, ગોપીગંજ, લાલાનગર, થાણા ઓંજ અને બોર્ડર પાસે રોકી દેવામાં આવ્યાં છે. વારાણસીમાં બુધવારે સાંજ સુધી વારાણસીથી પ્રયાગરાજ જતા તમામ માર્ગો પર 20 કિલોમીટર લાંબો જામ હતો. પોલીસે વેરિકેડ લગાવી દીધાં છે.

પ્રયાગરાજ જતાં લગભગ 40 હજાર વાહનોને રોકી દેવામાં આવ્યાં છે. પાર્કિંગમાં 10 હજારથી વધુ વાહનો પાર્ક કરવામાં આવ્યાં છે. જીટી રોડ પર લગભગ 20 કિલોમીટર લાંબો જામ છે. મહાકુંભમાં ભાગ લેવા નીકળેલા હજારો લોકો બસો, કાર અને અન્ય વાહનોમાં ફસાયેલા છે. હાલમાં 50થી વધુ બસો વારાણસીના સ્ટેશન પર છે, જ્યારે 200થી વધુ બસો વારાણસી પ્રયાગરાજ રૂટ પર અટવાયેલી છે.

મુસાફરોએ શું કહ્યું છત્તીસગઢના કાંકેરના રહેવાસી વાસુદેવ ભલ્લાદ્વારે કહ્યું- હું તીર્થયાત્રા માટે આવ્યો છું. પરંતુ અમને રોકવામાં આવ્યા છે. અહીં પાણી અને શૌચાલયની સુવિધા નથી. શિયાળાની ઋતુમાં તેઓ ખુલ્લામાં રાત વિતાવવાની મજબૂર થયા છે.

આગ્રાના ભોલેનાથ શર્માએ કહ્યું- હું સાંજે અહીં આવ્યો હતો. અમને રોકવામાં આવ્યા. અહીં કોઈ સુવિધા નથી. મોબાઈલ ચાર્જ કરવા માટે વીજળી પણ નથી. ઘરનો સંપર્ક પણ કરી શકતા નથી.

આગ્રાના પ્રવીણકુમાર શર્માએ કહ્યું- હું પ્રવાસ પર નીકળ્યો છું. કાશી અને પ્રયાગરાજ પછી આપણે ચિત્રકૂટ જવાનું છે. તેને અહીં રોકી દેવામાં આવ્યા છે. લગભગ 400 લોકો અમારી સાથે છે.

ફરિદાબાદની ગીતાએ કહ્યું- કોઈ સુવિધા નથી. સંગમમાં સ્નાન કરવા જતાં હતાં. અહીં રોકાયા છીએ, પણ કોઈ સુવિધા નથી.

2. મિરઝાપુરથી પ્રયાગરાજ તરફ આવતાં વાહનો

રોડવેઝ બસો પરત ફરતી રહી, 2 હજાર વાહનો થંભી ગયાં મિરઝાપુરમાં રોડવેઝની બસો પરત કરવામાં આવી રહી છે. મહેશ ભટ્ટાચાર્ય ઈન્ટરમીડિયેટ કોલેજ, અકોઢીમાં હંગામી રેનબસેરા બનાવવામાં આવ્યા છે. અહીં મુસાફરોને રોકી દેવામાં આવ્યા છે. વહીવટીતંત્રનું કહેવું છે કે જ્યારે ભીડ ઓછી થશે ત્યારે જ આગળ જવા દેવામાં આવશે. શૌચાલયની સુવિધાના અભાવે મહિલાઓને મુશ્કેલીનો સામનો કરવો પડી રહ્યો છે.

ગુલાબ કલી ગર્લ્સ ઇન્ટર કોલેજ, મોહનપુર અને જિજ્ઞા ખાતે હોલ્ડિંગ એરિયા બનાવવામાં આવ્યા છે. સ્થાનિક રહેવાસી બ્રિજેશ પ્રતાપ સિંહે જણાવ્યું કે સવારથી જ વાહનોને રોકવામાં આવી રહ્યાં છે. લગભગ 2 હજાર વાહનોને અટકાવી દેવામાં આવ્યાં છે. માર્ગમાં ફસાયેલા પ્રવાસીઓ માટે સ્થાનિક લોકોએ ભોજનની વ્યવસ્થા કરી છે.

રાકેશ અને વિપીને જણાવ્યું કે અમને રસ્તામાં રોકી દેવામાં આવ્યા છે. અમે અકબરપુરથી આવી રહ્યા છીએ. જે વાહનોમાં ધ્વજ હોય ​​તેને પસાર થવા દેવામાં આવે છે. VIPને જવા દેવામાં આવી રહ્યા છે. સામાન્ય માણસ અટવાઈ ગયા છે. પાણી અને શૌચાલયની સુવિધા સારી નથી.

3. ભદોહી-પ્રયાગરાજ રૂટની સ્થિતિ

નેશનલ હાઈવે પર જામ, મુસાફરો મક્કમ છે પ્રયાગરાજ જતા લોકોને ભદોહીમાં રોકી દેવામાં આવ્યા હતા. જ્યાં જિલ્લા વહીવટી તંત્ર અને સામાજિક સેવા સંસ્થાઓ દ્વારા શ્રદ્ધાળુઓને નાસ્તો અને ભોજન આપવામાં આવ્યું હતું. જિલ્લા વહીવટીતંત્રે બપોરે 3:00 વાગ્યાથી વાહનોને જવા દેવાનું શરૂ કર્યું હતું. સાંજે 4:00 વાગ્યા સુધી જિલ્લાનાં વિવિધ સ્થળોએ રોકાયેલા શ્રદ્ધાળુઓને પ્રયાગરાજ જવા માટે સંપૂર્ણપણે જવા દેવામાં આવ્યા હતા.

સવારે ગોપીગંજ લાલ નગર ટોલ પ્લાઝા, જાંગીગંજ બાબુ સરાય ઉંજ બોર્ડર પર મોટી સંખ્યામાં મુલાકાતીઓ રોકાયા હતા. થોડા કલાકો રાહ જોયા બાદ તેઓ પાછા ફર્યા, જ્યારે કેટલાક સ્થાનિક ગંગા ઘાટ પર સ્નાન કરીને નીકળી ગયા. પરંતુ કેટલાક મુસાફરો એ વાત પર મક્કમ હતા કે તેઓ પ્રયાગરાજમાં જ સ્નાન કરશે. પરિસ્થિતિ સામાન્ય થતાં તેમને જવા દેવામાં આવ્યા. જિલ્લાના નેશનલ હાઈવે પર દર 2 કિલોમીટરના અંતરે બેરિકેડ લગાવવામાં આવ્યાં છે.

શું કહ્યું મુસાફરોએ…

મુસાફર બદ્રીએ કહ્યું- હું સવારના 3 વાગ્યાથી નીકળ્યો છું. અહીં રોકી દેવામાં આવ્યો છે. કેમ્પમાં વ્યવસ્થા સારી છે.

4. ચિત્રકૂટ-પ્રયાગરાજ રૂટની સ્થિતિ

દર 5 મિનિટે 10 વાહનોનો કાફલો રવાના થઈ રહ્યો છે સોમવારે રાત્રે 2 વાગ્યાથી પ્રયાગરાજ જતા ભક્તોને ચિત્રકૂટમાં રોકી દેવામાં આવ્યા છે. જેના કારણે બુંદેલખંડ એક્સપ્રેસ વે પર 10 કિલોમીટર લાંબો જામ થઈ ગયો હતો. મંગળવારે સાંજે 4 વાગ્યા પછી, ચિત્રકૂટ પ્રશાસને ધીમે ધીમે બુંદેલખંડ એક્સપ્રેસવે પર ફસાયેલા શ્રદ્ધાળુઓને પ્રયાગરાજ જવાની મંજૂરી આપી. દર 5 મિનિટે 10 વાહનોનો કાફલો રવાના થઈ રહ્યો છે. જેના કારણે ભક્તોએ રાહતનો શ્વાસ લીધો છે. અહીં સ્થિતિ એવી છે કે લોકો છેલ્લા 20 કલાકથી એક્સપ્રેસ વે પર ભૂખ્યા-તરસ્યા રહેલા છે.

ભરત કુપમાંથી લોટ અને કઠોળ જેવી આવશ્યક ચીજવસ્તુઓ એકત્ર કરવા ભક્તોને 5 કિલોમીટર પગપાળા જવું પડે છે. વહીવટીતંત્ર શ્રદ્ધાળુઓ પર વતન પરત ફરવા માટે દબાણ કરી રહ્યું છે, પરંતુ શ્રદ્ધાળુઓ તેમની સામે ઝૂકવા તૈયાર નથી. ભક્તોનું કહેવું છે કે જ્યાં સુધી તેમને પ્રયાગરાજ જવાની મંજૂરી નહીં મળે ત્યાં સુધી તેઓ બુંદેલખંડ એક્સપ્રેસ વે છોડશે નહીં.

શું કહ્યું મુસાફરોએ…

રાજસ્થાનના બારાના રહેવાસી રવિન્દ્રએ કહ્યું- હું આખી રાત ફરવા આવ્યો છું. અમને અહીં રોકવામાં આવ્યા છે. આગળ જવા દેતા નથી. યોગીજીએ કહ્યું હતું કે દરેક વ્યક્તિએ પ્રયાગરાજ પહોંચવું જોઈએ. પરંતુ અમને જવા દેવામાં આવતા નથી. સુવિધા પણ નથી.

5. જૌનપુર-પ્રયાગરાજ રૂટની સ્થિતિ

બસ સ્ટેન્ડ પર બસો રોકાવાને કારણે પેસેન્જર ટ્રેનો રદ, ભીડ વધી

મહાકુંભ મેળામાં નાસભાગ બાદની સ્થિતિને જોતા બુધવારે જાફરાબાદ જંક્શનથી પ્રયાગરાજ જતી અલ્હાબાદ-પ્રયાગરાજ પેસેન્જર અને જૌનપુર-બરેલી પેસેન્જર રદ કરવામાં આવી હતી. ગોરખપુરથી પ્રયાગરાજ વાયા જાફરાબાદ જતી ગોદાન એક્સપ્રેસ 11056નો રૂટ ડાયવર્ટ કરીને વારાણસી થઈને ચલાવવામાં આવી રહી છે. વિશેષ સાપ્તાહિક ટ્રેન એલટીટી એક્સપ્રેસ, જે અયોધ્યાથી જાફરાબાદ વાયા મડિયાહુન જતી હતી, તે પણ વારાણસી થઈને ચલાવવામાં આવી રહી છે.

બસ સ્ટેન્ડ પર ભક્તોની ભીડ જામી છે. લોકો મહાકુંભમાં જવા માટે તૈયાર છે, પરંતુ બસો ન મળવાના કારણે લોકો પરેશાન છે. ભક્તો કહે છે કે અમને રોક્યા છે. જો મંજૂરી મળી હોત તો સારું થાત.