જયપુર,રાજસ્થાન હાઈકોર્ટે સંજીવની ક્રેડિટ કો-ઓપરેટિવ સોસાયટી કેસમાં વચગાળાની રાહત આપતાં કેન્દ્રીય મંત્રી ગજેન્દ્ર સિંહ શેખાવતની ધરપકડ પર રોક લગાવી દીધી છે. ૯૦૦ કરોડથી વધુના કથિત કૌભાંડની એફઆઈઆરમાં પ્રધાનનું નામ આરોપી તરીકે ન હોવા છતાં, તેમણે રાહતની માંગ કરતી વિશેષ અરજી કરી હતી. રાજસ્થાન સ્પેશિયલ ઓપરેશન ગ્રુપ આ મામલાની તપાસ કરી રહ્યું છે.
જસ્ટિસ કુલદીપ માથુરની બેન્ચે અરજી પર સુનાવણી કરી અને તેમને ધરપકડમાંથી રાહત આપી. કોર્ટે આ મામલાની વધુ સુનાવણી ત્રણ અઠવાડિયા પછી મુલતવી રાખી છે. શેખાવતે ૨૪ માર્ચે આ કેસમાં દાખલ કરવામાં આવેલી એફઆઈઆરને રદ્દ કરવા અને સીબીઆઈને તપાસ સોંપવાની માંગ કરતી અરજી દાખલ કરી હતી. તેમના વકીલ ધીરેન્દ્ર સિંહ દસપાને કહ્યું કે રાજ્ય સરકાર પાસે આ મામલે કોઈ અધિકારક્ષેત્ર નથી, તેથી તેમણે સીબીઆઈને તપાસ સોંપવાની માંગ કરી છે. રાજસ્થાનના મુખ્યમંત્રી અશોક ગેહલોત શેખાવત અને તેમના પરિવાર પર રોકાણકારોની થાપણોમાં ગેરરીતિઓને લઈને સતત પ્રહારો કરી રહ્યા છે, ત્યારબાદ કેન્દ્રીય મંત્રી કોર્ટમાં પહોંચ્યા.
શેખાવતે દિલ્હીમાં ગેહલોત સામે ફોજદારી માનહાનિનો કેસ પણ દાખલ કર્યો છે અને આરોપ લગાવ્યો છે કે કોંગ્રેસ નેતાએ તેમની છબીને નુક્સાન પહોંચાડતા ખોટા આક્ષેપો કર્યા છે. દરમિયાન, ગેહલોતે ગુરુવારે માંગ કરી હતી કે વડા પ્રધાન નરેન્દ્ર મોદીએ સંજીવની ક્રેડિટ કો-ઓપરેટિવ સોસાયટી કેસમાં તેમની કથિત સંડોવણી બદલ શેખાવતને કેબિનેટમાંથી કાઢી મૂકવો જોઈએ. મુખ્યમંત્રીએ જયપુરમાં પત્રકારોને કહ્યું, “તેમને કેન્દ્રીય મંત્રી તરીકે ચાલુ રાખવાનો નૈતિક અધિકાર નથી. વડાપ્રધાને આવા મંત્રીને બરતરફ કરવા જોઈએ.